Шымкент қаласында медициналық және фармацевтикалық қызметтердің сапасын арттыру, азаматтардың құқықтарын қорғау және денсаулық сақтау саласындағы заң талаптарының сақталуын қамтамасыз ету бағытындағы жұмыстар тұрақты жүргізіліп келеді. Қазақстан Республикасы Денсаулық сақтау министрлігі Медициналық және фармацевтикалық бақылау комитетінің Шымкент қаласы бойынша департаменті 2026 жылдың бірінші жартыжылдығында осы бағытта бірқатар маңызды жұмыстар атқарды.
Бұл туралы Өңірлік коммуникациялар қызметі алаңында өткен «Шымкент қаласы бойынша медициналық және фармацевтикалық бақылау саласында атқарылған жұмыстар, қол жеткізілген нәтижелер және алдағы кезеңге арналған жоспарлар туралы» тақырыбындағы баспасөз конференциясында айтылды. Жиын барысында департамент өкілдері есепті кезеңдегі жұмыстардың нәтижелері мен алдағы міндеттер туралы баяндады.
2026 жылдың І жартыжылдығында департамент медициналық қызмет көрсету сапасын бақылау, фармацевтикалық қызметті лицензиялау, медицина мамандарына сертификат беру және өзге де мемлекеттік қызметтер көрсету бағытында жұмыс атқарды. Нәтижесінде медициналық қызмет көрсету саласында 1 814 мемлекеттік қызмет көрсетілсе, фармацевтикалық сала бойынша 458 мемлекеттік қызмет ұсынылды.
Мемлекеттік қызмет көрсету барысында азаматтарға медициналық ұйымдардың қызметі, мамандардың кәсіби біліктілігін растау, дәрілік заттар айналымына қатысты рәсімдер және басқа да бағыттар бойынша тиісті көмек көрсетілді. Бұл жұмыстар тұрғындарға сапалы әрі қолжетімді медициналық қызмет алуға мүмкіндік беріп, денсаулық сақтау саласындағы басқару тиімділігін арттыруға ықпал етеді.
Сонымен қатар департамент азаматтар мен заңды тұлғалардың өтініштерін қарау жұмыстарын тұрақты негізде жүргізді. Алты ай ішінде мекемеге 446 өтініш келіп түсіп, олардың әрқайсысы қолданыстағы заңнама талаптарына сәйкес зерделенді. Құзыретіне кірмейтін мәселелер бойынша 132 өтініш тиісті уәкілетті органдарға жолданса, 99 өтініш бойынша азаматтарға заң аясында түсіндірме берілді.
Түскен өтініштердің 126-сы бойынша тексеру іс-шаралары ұйымдастырылды. Азаматтардың шағымдары негізінен медициналық қызмет көрсету сапасына, дәрілік заттармен қамтамасыз ету мәселелеріне және медициналық көмекті ұйымдастыру тәртібіне қатысты болды. Сонымен қатар терапиялық, хирургиялық, акушерлік-гинекологиялық, педиатриялық, стоматологиялық қызметтер және дәрілік заттар мен медициналық бұйымдардың айналымы бойынша өтініштер қаралды.
Мемлекеттік бақылау шаралары аясында 2026 жылдың алғашқы алты айында 133 жоспардан тыс тексеру жүргізілді. Оның ішінде 56 өтініш негізді деп танылса, 48 өтініш ішінара негізді деп бағаланды. Ал 29 өтініш бойынша медициналық және фармацевтикалық қызмет саласындағы заңнама талаптарының бұзылғаны анықталған жоқ.
Тексеру жұмыстарының негізгі мақсаты – медициналық ұйымдардың қызмет сапасын арттыру, пациенттердің құқықтарын қорғау және денсаулық сақтау саласындағы қауіпсіздікті қамтамасыз ету. Департамент мамандары анықталған мәселелер бойынша тиісті шаралар қабылдап, заң талаптарының орындалуын бақылауда ұстайды.
Медициналық және фармацевтикалық бақылау саласындағы жүйелі жұмыстар тұрғындарға көрсетілетін қызметтердің сапасын жақсартуға бағытталған. Алдағы кезеңде де департамент медициналық көмектің сапасын арттыру, фармацевтикалық қызметтің талаптарға сай жүргізілуін қамтамасыз ету және азаматтарға көрсетілетін мемлекеттік қызметтердің тиімділігін көтеру бағытындағы жұмыстарды жалғастырады.
