Шымкент қаласында тағы 30 отбасы баспаналы болып, жаңа пәтерлердің кілтіне ие болды. Қоныс иелеріне пәтер кілттерін табыстау рәсімі «Көрме» орталығында өтіп, оған қала әкімі Ғабит Сыздықбеков қатысып, тұрғындарды айтулы қуанышымен құттықтады. Өз сөзінде қала басшысы азаматтарды тұрғын үймен қамтамасыз ету – мемлекеттің әлеуметтік саясатының маңызды бағыттарының бірі екенін атап өтіп, бұл жұмыстардың халықтың әл-ауқатын арттыруға, өмір сүру сапасын жақсартуға және әлеуметтік тұрақтылықты нығайтуға ықпал ететінін жеткізді. Сондай-ақ ол қоныс тойын тойлап жатқан отбасыларға амандық, бақ-береке және жаңа шаңырақтарында шаттық пен молшылық тіледі.
Жаңа баспаналар «Отбасы банк» АҚ-ның «2-10-20» және «5-10-20» жеңілдетілген ипотекалық бағдарламалары аясында берілді. Пәтерлер Шымкент қаласының қарқынды дамып келе жатқан Бозарық шағынауданында орналасқан. Жаңа қоныс иелерінің қатарында көпбалалы отбасылар, жетім балалар мен ата-анасының қамқорлығынсыз қалған балалар, сондай-ақ білім беру, денсаулық сақтау және өзге де бюджет саласында қызмет ететін мамандар бар. Бұл бағдарламалар әлеуметтік осал санаттағы азаматтардың тұрғын үйге қолжетімділігін арттыруға және олардың баспана мәселесін кезең-кезеңімен шешуге мүмкіндік беріп отыр.
Қалада тұрғындарды қолжетімді әрі жайлы баспанамен қамтамасыз ету бағытындағы жұмыстар жүйелі түрде жалғасуда. Соңғы жылдары мемлекеттік тұрғын үй бағдарламалары аясында жаңа көпқабатты үйлер салынып, инженерлік инфрақұрылым дамытылып келеді. Сонымен қатар, жаңа тұрғын аудандарда жол, мектеп, балабақша және өзге де әлеуметтік нысандардың құрылысына ерекше көңіл бөлініп, тұрғындарға қолайлы өмір сүру ортасын қалыптастыру көзделген. Бұл бастамалар Мемлекет басшысының тапсырмалары мен мемлекеттік бағдарламалар аясында жүзеге асырылып, алдағы уақытта да баспанаға мұқтаж азаматтарды тұрғын үймен қамтамасыз ету жұмыстары кезең-кезеңімен жалғасатын болады.
Айта кетейік, Шымкент қаласында тұрғын үй салу және халықты баспанамен қамту мәселесіне ерекше назар аударылып келеді. Қала аумағында жаңа тұрғын кешендері бой көтеріп, азаматтардың жайлы өмір сүруіне қажетті жағдайлар жасалуда. Әсіресе әлеуметтік қолдауға мұқтаж отбасыларды, жас мамандарды және көпбалалы жанұяларды баспанамен қамтамасыз ету бағытындағы жобалар тұрақты түрде жүзеге асырылып отыр. Алдағы уақытта да тұрғындардың сұранысын ескере отырып, қолжетімді тұрғын үй санын арттыру, сапалы құрылыс жүргізу және қаланың инфрақұрылымын дамыту жұмыстары жалғасын табады.
