Қорғаныс ведомствосының Ақпарат және коммуникациялар департаментінің командасы футзалдан БАҚ арасындағы VIII чемпионаттың (BAQ League) жеңімпазы атанды.
Кезекті чемпионатқа еліміздің барлық бұқаралық ақпарат құралдарынан жетекші 15 команда қатысты. Турнир қазан мен ақпан айында бір айналымда өтті.
Биылғы біріншілікте «Хабар» телеарнасы мен қорғаныс ведомствосының баспасөз қызметі арасындағы чемпион атану жолындағы табанды күрес соңғы турға дейін жалғасты. Ақтық ойында дәл осы командалар алаңда кездесті.
Соңғы кезеңнің алдында әскери журналистер «Хабар» телеарнасынан екі ұпай озып, олар тең ойнаса да болар еді. Осыған қарамастан, Қорғаныс министрлігінің баспасөз қызметінің командасы кездесудің алғашқы минуттарынан бастап басымдыққа ие болып, нәтижесінде 8:4 есебімен жеңіске жетті.
Екінші орын «Хабар» телеарнасына бұйырды. «Қола» жүлде «Qazaqradiolary» ұжымының еншісінде.
Әскери команданың капитаны Ғани Нүсіпов бұл жеңісті еліміздің тәуелсіздігінің 30 жылдығына және ел егемендігін қалтықсыз күзетіп жүрген әскерімізге арналатындығын жеткізді.
Биыл «BAQ League» чемпионаты сегізінші рет өтті. Алдыңғы жеті турнирде «Хабар» телеарнасының командасы жеңіске жеткен болатын.
