Қазақстан Республикасының Президенті Еуразиялық экономикалық одаққа мүше мемлекеттер мен Сербия Республикасы арасындағы еркін сауда туралы келісімді ратификациялау туралы Заңға қол қойды. Келісім 2019 жылғы 25 қазанда жасалды. Тауарлардың көпшілігі бойынша Келісім күшіне енгеннен кейін ЕАЭО елдері мен Сербия арасында бажсыз сауда режимі белгіленеді. Бұл қазақстандық тауарлар үшін серб нарығына қолжетімділікті айтарлықтай жеңілдетуі тиіс.
«Келісім тауар номенклатурасының 93%-і бойынша кедендік әкелу баждарын өзара алып тастау және бірқатар тауарларды бажсыз әкелуге квота беру арқылы Сербиямен сауда шарттарын ырықтандырады. Бұл ретте, ұлттық өндірушілерді қорғау үшін Тараптар құс еті, қант, маталар, компрессорлар, көлік құралдары сияқты аса сезімтал тауарлар бойынша импорттық баждарды қолдану мүмкіндігін қарастырды», — деп Қазақстан Республикасының Сауда және интеграция вице-министрі Ж.Кушукова атап өтті.
«Біз қазақстандық тауарлардың Сербияға экспортын ұлғайту әлеуетін шамамен 250 млн. АҚШ долларына бағалаймыз. Бұл мұнай-химия, металлургия, тамақ, машина жасау, өнеркәсіптің химия салаларының тауарлары, сондай-ақ құрылыс материалдары», — деп түсіндірді вице-министр. «Әлеуетті іске асыру отандық өндірушілердің белсенділігіне байланысты болады,»- деп атап өтті соңында вице-министр.
Сербия Дүниежүзілік сауда ұйымының мүшесі болып табылмайды, алайда осы Келісім шеңберінде санитариялық және фитосанитариялық шаралар, саудадағы техникалық кедергілер, зияткерлік меншік, дауларды шешу, электрондық коммерция және т.б. салаларда халықаралық стандарттарды қолдануға кепілдік береді. Бұл серб нарығында қазақстандық тауарлардың болжамдылығына және негізсіз шектеулердің қолданылмауына кепілдік береді.
Тұтастай алғанда, осы Келісімді іске асыру Еуразиялық экономикалық одақ елдері мен Сербия Республикасы арасындағы сауда байланыстарын дамытуға және нығайтуға, Тараптардың өзара сауда көлемінің көрсеткіштерін ұлғайтуға ықпал ететін болады, қазақстандық тауарларды Сербия нарығына ілгерілету үшін қолайлы жағдайлар жасайды.
Анықтама: Қазақстан мен Сербия арасындағы тауар айналымы 2020 жылы 15,7 млн. АҚШ долларын құрды. Қазақстаннан Сербияға экспорт 1,8 млн. АҚШ. долларын құрады. Қазақстанға Сербиядан Импорт-13,9 млн. АҚШ долларын құрады.
