«AMANAT» ПАРТИЯСЫНЫҢ ӨКІЛДЕРІ ТАЗАЛЫҚ АКЦИЯСЫН ҰЙЫМДАСТЫРДЫ

«AMANAT» партиясы Шымкент қалалық филиалының ұйымдастыруымен кезекті рет «Таза бейсенбі» экологиялық шарасы өтті. Қалалық және аудандық филиалдардың қызметкерлері мен «Жастар рухы» жастар қанатының өкілдері атсалысқан акцияға жалпы 50-ге жуық азамат қатысты. Бұл тазалық шарасы Еңбекші ауданы, Берди Қожа көшесінде ұйымдастырылды. Қатысушылар көше бойында шашылған қоқыстарды жинап, қураған ағаштардан тазарту жұмыстарын жүргізді. Бұл шараның басты мақсаты – қала аумағында экологиялық жағдайды жақсарту, тұрғындардың тазалыққа деген жауапкершілігін арттыру. «Таза бейсенбі» акциясы Мемлекет басшысы Қасым-Жомарт Тоқаевтың тапсырмасымен бастау алған «Таза Қазақстан» экологиялық жобасы аясында өткізіледі. Бейсенбі күндері тұрақты түрде өтетін бұл шараның мақсаты экологиялық жауапкершілік пен тазалықты насихаттау. Бір жылға жуық уақыт ішінде 3,6 мыңнан астам адам қатысып, 40 тоннаға жуық қоқыс қала аумағынан шығарылды. Қалалық және аудандық деңгейде осындай экологиялық акциялар тұрақты түрде өткізілуде, тұрғындардың белсенді қатысуы қала тазалығын сақтауға үлкен үлес қосуда.