«AMANAT» ПАРТИЯСЫНЫҢ МҮШЕЛЕРІ ХАЛЫҚТЫҢ МӘСЕЛЕСІН ТЫҢДАДЫ

«AMANAT» партиясы Шымкент қалалық филиалының қоғамдық қабылдау бөлмесі Әл-Фараби ауданының 276 орамында мобильді қоғамдық қабылдау өткізді. Қабылдауға партия филиалы Атқарушы хатшысының орынбасары Ербол Байқонысов, «Қоғамдық қабылдау» бөлімінің меңгерушісі Г.Баетова, Әл-Фараби аудандық филиалының атқарушы хатшысы Ердәулет Жүнісбек, мәслихат депутаттары Бақытжан Позилов, Бөкейхан Әбішев, Әл-Фараби ауданы әкімдігінің аппарат басшысы Ж.Оспанов қатысып, жергілікті халықтың арыздары мен шағымдарын тыңдады. Қабылдауға келген тұрғындардың негізгі көтерген мәселелері инфрақұрылым саласымен байланысты болды. Қала көшелеріне асфальт төсеу, қоғамдық көліктердің бағытын өзгерту, автобус санын арттыру және жолдарды кеңейту сияқты маңызды тақырыптар қозғалды. Сонымен қатар, кейбір азаматтар көшелерге атау беру мәселесін де көтерді. Қабылдауда көтерілген мәселелердің барлығы мұқият тыңдалып, депутаттық сауалдар әзірленіп, тиісті мекемелерге ресми хаттар жолданатын болды. Бұл қоғамдық қабылдау алаңының ерекше маңызы бар. Халықпен тікелей кездесіп, олардың проблемаларын тыңдап, оң шешім табуына ықпал ету – партияның негізгі мақсаттарының бірі. «AMANAT» партиясы бұл жобаны тиімді жүзеге асырып, тұрғындардың көкейкесті мәселелеріне назар аударып келеді. Қабылдауға қатысқан партия өкілдері алдағы уақытта барлық көтерілген мәселелердің бақылауда болатынын және олардың шешімін табу үшін қажетті шаралардың қабылданатынын жеткізді. Бұл қоғамдық қабылдау алаңы азаматтардың мәселелерін шешуде үлкен рөл атқарып, партия мен халық арасындағы байланысты нығайтуда маңызды қадам болып табылады.