Қазақстан Республикасы Сыртқы істер министрінің бірінші орынбасары Ақан Рахметуллин Бразилияның Елшісі Рубем Корреа Барбозаны оның дипломатиялық миссиясының аяқталуына орaй қабылдады.
Кездесу қарсаңында дипломаттар ҚР СІМ ғимаратында Президент Қасым-Жомарт Тоқаевтың Қазақстан халқына Жолдауын онлайн тыңдап, еліміздің әлеуметтік-экономикалық дамуының стратегиялық міндеттерін шешуге бағытталған негізгі ережелерін талқылады.
Кездесу аясында бразилиялық дипломатқа екіжақты қарым-қатынастарды дамытуға қосқан елеулі үлесі үшін Қазақстан Республикасы Премьер-Министрінің орынбасары – Сыртқы істер министрі Мұрат Нұртілеудің алғыс хаты табыс етілді.
Тараптар бүгінгі таңда Қазақстан мен Бразилия екіжақты және көпжақты күн тәртібіндегі өзара іс-қимылды одан әрі кеңейту бойынша белсенді жұмыс істеп жатқанын өзара атап өтті.
Мәдени-гуманитарлық байланыстарға ерекше көңіл бөлінді. Қазақ дипломаты бразилиялық спортшыларға 2024 жылғы 8-13 қыркүйек аралығында Астанада өтетін 5-ші Дүниежүзілік көшпенділер ойындарында сәттілік тіледі.
Кездесу соңында Елші Р. Корреа елімізде болған жылдар барысында жылы қабылдау алғаны үшін алғысын білдірді.
Бразилия – Қазақстаның Латын Америкасы мен Кариб бассейніндегі мемлекеттер арасында негізгі сауда-экономикалық серіктесі. 2024 жылғы қаңтар-шілде айларында екіжақты тауар айналымы 143,7 млн АҚШ долларын құрады.
Қазақстан Республикасы Сыртқы істер министрінің орынбасары Ермұхамбет Қоныспаев Өзбекстан Республикасының Қазақстан Республикасындағы жаңадан тағайындалған Елшісі Бахтиёр Ибрагимовтан сенім грамоталарының көшірмелерін қабылдады.
Е. Қоныспаев Елшіні тағайындалуымен құттықтап, оның қызметі екі ел арасындағы стратегиялық серіктестік пен одақтастықты одан әрі нығайтуға ықпал ететініне сенім білдіріп, жұмыста табыс тіледі.
Сұхбат барысында мемлекет басшыларының саяси ерік-жігерінің арқасында қазақ-өзбек қатынастары өзара іс-қимылдың сапалы жаңа деңгейіне шығарылғаны аталып өтті. Осы тұрғыда тараптар саяси, сауда-экономикалық, инвестициялық және мәдени-гуманитарлық салалардағы екіжақты өзара іс-қимылды одан әрі кеңейтудің жай-күйі мен перспективаларын талқылады. Өзбекстан Президенті Шавкат Мирзиёевтің ағымдағы жылдың тамыз айында Қазақстанға жасаған мемлекеттік сапарының қорытындылары бойынша қол жеткізілген уағдаластықтарды тиімді іске асыруға ерекше назар аударылды.
