Алғашқы жартыжылдықтың қорытындысы бойынша Қазақстан Өзбекстанның негізгі сауда серіктестерінің үштігінде қалды.
Қаңтар-маусым айларында елдегі сыртқы сауда айналымы 31,8 млрд долларға жетіп, былтырғы кезеңмен салыстырғанда 8,5%-ға өсті. Өзбекстан Статистика агенттігінің ақпаратына сай, бүгінгі таңда көршілес мемлекет әлемнің 186 елімен сауда-саттық жасайды.
Жарты жылдың қорытындысы бойынша елдің басты сауда серіктестері көшін Қытай бастап тұр. Екі мемелекет арасындағы тауар айналымы 5,8 млрд доллардан (жалпы көлемнің 18,5%) асты. Одан кейінгі орында сауда-саттықтың 18,1% үлесі тиесілі Ресей тұр. Бұл елмен арадағы импорт-экспорт көлемі 5,7 млрд доллардан артық.
Сонымен қатар, көшбасшылардың үштігін Қазақстан түйіндеді. Біздің ел мен Өзбекстан арасындағы тауар айналымы 1,9 млрд доллардан асты (жалпы көлемнің 6%).
«Қазақстан Қытай мен Ресейден кейінгі Өзбекстанның ең ірі сыртқы экономикалық серіктестерінің біріне айналды. Бұған ортақ шекараның болуы, ТМД аясында еркін сауда жасау, сондай-ақ өзара экономикалық қатынастарды жүйелі жолға қою ықпал етті», — делінген Статистика агенттігінің деректерінде.
Қамтылып отырған кезеңде Өзбекстан Қазақстанға 619,8 млн доллардың тауарын экспорттап, 1,2 млрд доллардың тауарын импорттаған.
Жалпы, Қазақстан – сыртқы сауда көлемі бойынша Өзбекстанның негізгі үш сауда серіктесінің бірі. 2016-2023 жылдар аралығында сауда көлемі 2,5 есеге өсіп, 4,5 миллиард долларға жетті. Өзбекстан мен Қазақстанның экономикалық ынтымағы ТМД аясында екіжақты және көпжақты келісімдерге сай «Еркін сауда» режимінде жүзеге асырылады. Өткен жылы екі ел арасындағы тауар айналымы 4,4 млрд АҚШ долларын құрады. Бұл туралы Сауда және интеграция министрі Арман Шаққалиев пен Өзбекстанның Инвестициялар, өнеркәсіп және сауда министрі Лазиз Құдратовтың кездесуінде айтылды. Тараптар Астанадағы басқосуда қазақ-өзбек сауда экономикалық ынтымақтастық мәселелерін талқылады. Айта кету керек, Өзбекстан Қазақстанның ірі сауда серіктестерінің бірі саналады. Өзбекстан біздің елге жеміс-көкөніс өнімдерін жеткізіп отырған елдер арасында да көш бастап тұр. Қазақстанның Орталық Азиямен тауар айналымының 57% -дан астамын құрайды. Тараптар алдағы қыркүйек айында «Халыққа қызмет көрсету орталығы — Орталық Азия» индустриялдық аймағында жобалардың тұсаукесерін ұйымдастырмақ.
