Биыл қазақтың көрнекті ақыны, Халықаралық «Алаш» сыйлығының, «Барыс» және «Парасат» ордендерінің иегері Ханбибі Есенқарақызы 75 жасқа толып отыр. Ханбибі Есенқарақызы 14 көркем әдеби кітаптың авторы. Қарымды қаламгердің өлеңдері бүгінде орыс, украин, қырғыз, өзбек, якут тілдеріне аударылған. Оның «Алтынай», «Нүрикамал», «Қадиша», «Дос іздедім» «Махаббат-өмірлері» сынды өлеңдеріне ән жазылып, халық арасында кеңінен таралған.
Ақынның шығарма¬шылығы тек Қазақстанда ғана емес, шетелде де кеңінен танымал. Сондықтан болса керек, ме¬рейтойға Өзбекстаннан келген оқырмандар мен қатар жвзушының замандастары мен қаламдастары да құттықтап келіп ақын абыройын одан әрі асқақтата түсті.
Ханбибі Есенқарақызын әділдігі мен өр мінезі үшін халық оны Хан қызындай Ханбибі деп те атап кеткен. Оның шығармаларының қазақ поэзиясында алар орны ерекше.Шынайы мөлдір рухты өлеңдері кез-келген жастағы жанның жүрегін баурап алары анық.
Осы ретте, әр қазақтың бойына бесік жырындай дарыған «Нурикамал» әнінің авторы Ханбибі Есенқарақызымен Әл-Фараби атындағы қалалық ғылыми-әмбебап кітапханасында сыр сұхбат өтті.
100-ге жуық оқырманы мен елге сыйлы азаматтар жиналған жиынның мақсаты Ханбибі Есенқарақызының шығармашылығына ақынның өзімен бірге үңілу. Шымкент қалалық мәдениет, тілдерді дамыту және архивтер басқармасының басшысы Бауыржан Орынтаев, ақын, Жазушылар одағының мүшесі Сатыбалды Қосалыұлы, жазушы, журналист Шойбек Орынбаевтар тік тұрып, қошеметпен қарсы алды.
Хан қызына көрсетілген құрметтен кем түспейтін халық қошеметінен кейін, ақынның шығармашылығы туралы бейне-ролик көрсетілді. Ханбибі апамыз өзінің өлеңдерінде бүгінгі қоғамдағы кемшін тұстарды қалт жібермейді. Тіпті алда болатын игілікті істерді елден бұрын болжап, өлеңіне арқау еткен.
Іс-шара барысында Ө.Жәнібеков атындағы ОҚПУ-нің студенттері түйткілді мәселелерді түйреп жазған поэзияды оқып, көпшілікке рухты сезім сыйлады. Сондай-ақ, Қазақстан композиторлар одағының мүшесі Құралай Сәтмұханбетова «Алтынай», «Көңілгүл» атты әндерін орындады.
