Қазақстан Республикасы Сыртқы істер министрінің орынбасары Роман Василенко мен Француз Республикасы Еуропа және Сыртқы істер министрлігі Континенталды Еуропа департаментінің директоры Брис Рокфөй қазақ-француз саяси консультацияларының 10-шы раундын өткізді.
Екіжақты ынтымақтастық мәселелерін талқылаған дипломаттар байланыстардың даму қарқынын және мемлекет басшылары – Қасым-Жомарт Тоқаев пен Эмманюэль Макрон арасында соңғы жылдары орнаған сенімді диалогты ерекше атап өтті.
Р.Василенко атап өткендей, «Мемлекет басшысының Парижге 2022 жылғы қарашадағы бірінші сапарымен, содан кейін бір жылға жетпей Франция Президентінің Қазақстанға жауап сапарымен жаңа кезеңге шығарылған стратегиялық серіктестік жақында жаңа сапаға көтерілмек».
Француз тарапы да Париждің Астанамен стратегиялық серіктестікті одан әрі тереңдетуге ерекше мән беретінін атап өтті. «Алдымызда жоспарланған екіжақты іс-шараларды ескере отырып, біз байланыстарымыздың жаңа парағын ашқалы отырмыз», – деп атап өтті француз делегациясының басшысы.
Келіссөздер барысында қазақ-француз серіктестігінің келешегі талқыланып, барлық салалардағы ынтымақтастықты тереңдету қадамдары белгіленді. Сауда-экономикалық, инвестициялық, энергетикалық, ауыл шаруашылығы, көлік-логистикалық және мәдени-гуманитарлық салалар, сондай-ақ су тақырыбы негізгі бағыттар ретінде белгіленді.
Тараптар машина жасау, жаңартылатын энергетика және сирек жер металдарын өңдеу салаларындағы бірлескен инвестициялық жобаларға терең талдау жүргізіп, олардың жүзеге асырылуын жеделдетуге қажетті қадамдарды белгіледі.
Француз тарапы Астанаға Қазақстан мен Еуропа Одағы арасындағы ынтымақтастықты дамытуда жан-жақты қолдау көрсетуге беріктігін растады.
Саяси консультациялар аясында халықаралық және өңірлік күн тәртібіндегі өзекті мәселелер бойынша да жан-жақты пікір алмасылды.
Келіссөздер нәтижесінде барлық деңгейдегі екіжақты байланыстарды нығайтуға өзара қызығушылық білдіріліп, Қазақстан мен Франция арасындағы стратегиялық серіктестік рухындағы ынтымақтастықты одан әрі дамытуға бейілділік расталды.
Қазақстан мен Франция 2008 жылы маусымда Парижде Стратегиялық серіктестікк шартына қол қойды.
2023 жылы Қазақстан мен Франция арасындағы тауар айналымы 4,2 млрд. АҚШ долл. жетті (экспорт – 3 млрд., импорт – 1,2 млрд.), бұл өткен жылға қарағанда 7,7% жоғары (4 млрд.). 2024 жылғы қаңтар-наурыз айларында екіжақты сауда көлемі 1,4 млрд. долл. құрады, бұл 2023 жылдың сәйкес кезеңімен салыстырғанда (1,1 млрд.) 34,5% жоғары.
2005 жылдан бастап Қазақстан экономикасына француз инвестициясы көлемі 19,1 мллрд. долл. Құрады (5-ші ірі инвестор). Бүгінгі таңда Қазақстанда француз капиталының қатысуымен 204 кәсіпорын жұмыс істейді.
