ФАРАБ КІТАПХАНАСЫНЫҢ ТӨРІНДЕ — СОЗАҚ АУДАНЫ

Түркістан қаласындағы «Фараб» ғылыми-әмбебап кітапханасында дәстүрлі түрде өткізіліп отырған «Шежірелі өлкеден – Рухани темірқазыққа» акциясы аясында «Кітап саяхаты -2023» атты кітап керуенімен аталған кітапхана төрінде қонақта Созақ аудандық орталықтандырылған кітапханасы болуына орай ауқымды мәдени іс-шара ұйымдастырылып,өткізілді.
Осы іс-шараның ашылу салтанатында сөз сөйлеген Созақ ауданы әкімінің орынбасары Қалдыбек Оразов, Ұлы Отан соғысының ардагерлеріне теңестірілген тыл ардагерлері, Түркістан қалалық ардагерлер кеңесінің мүшелері, Түркістан қаласының құрметті азаматтары Өтепберген Қуанышбай мен Кеңес Мәрсәлі және «Фараб» ғылыми-әмбебап кітапханасының директоры Жанат Шардарбекова өз сөздерінде барлық қатысушыларға шын жүректен құттықтауларын айтып, мәдени іс- шараның жоғары деңгейде өтуіне ізгі ниеттерін білдірді.
Созақ ауданының кітапханашылары «Фараб» ғылыми-әмбебап кітапханасының қорына 500 дана кітап және тактильді кітап сыйға тартса, Созақ ауданының белгілі азаматтары Нұржамал Төлеуова, Тұмартай Дінтайұлы мен Сәрсенбек Сайлаубекұлы кітап керуеніне қатысушылар мен көрермен қауымды айтулы іс- шараның өткізілуімен құттықтап, кітап сүйгіш оқырманның көбейе беруіне тілектестіктерін айтқаннан соң «Шежірелі Теріскей, Қазыналы Қаратау» тақырыбындағы арнайы ұйымдастырылған кітап көрмесі көрерменге таныстырылды.
Кітап керуеніне арналған мәдени іс-шара созақтық жазушы-аудармашы Елнұр Қайратұлының «Қасқыр ұлыған түн» шығармасының желісіндегі қойылымынан кейін ақын,жазушы- аудармашы Елнұр Қайратұлы және қазақ эстрадасының жұлдызы, «Жігіттер» тобының әншісі, «Дарын» мемлекеттік жастар сыйлығының лауреаты Ердос Қанаевтың қатысуында «Күзгі сыр» айдарымен дайындалған шығармашылық кездесу рухани әдеби-сазды кешке ұласты.
Мәдени іс-шараны қорытындылаған «Фараб» ғылыми-әмбебап кітапханасының директоры Жанат Шардарбекова Созақ ауданынан келген қонақтарға ризашылығын білдіріп, шынайы алғысын жеткізді.
Бақытжан БЕЙСЕМБАЕВ, Түркістан облыстық Қоғамдық кеңес мүшесі, «Бітімгер» медиаторлардың қоғамдық бірлестігінің басшысы