Арыс қаласының «№32 Ә.Жангелдин атындағы жалпы білім беретін мектебінде қазақ тілі мен әдебиеті пәнінің мұғалімі А.Бакирова 10-шы сынып оқушылары арасында қазақ әдебиетінің XX ғасырдағы жарық жұлдыздарының бірі — Оралхан Бөкейдің 80 жылдық мерейтойына байланысты сыныптан тыс танымдық сабағын өтті.
Мақсат — Оралхан Бөкей шығармаларын кеңінен насихаттау, таныстыру. Оқушылардың әдеби тілін дамыту, өз бетімен іздену, жазушының әңгімелері арқылы адамгершілікке тәрбиелеу.
Қазақ әдебиетінің ХХ ғасырдағы жарық жұлдыздарының бірі – Оралхан Бөкей 1943 жылы 28 қыркүйекте Шығыс Қазақстан облысы Катонқарағай ауданына қарасты Шыңғыстай ауылында дүниеге келген.
1968 жылдан бастап Алматы қаласына қоныс аударған. Оралхан Бөкей – жазушы, драматург. 1969 жылы ҚазМУ-ді бітірген. 1965-1968 жылы Шығыс Қазақстан облысының Үлкен Нарын (Большенарым) ауданында «Еңбек туы» газетінде корректор, аудармашы, редактордың орынбасары, Шығыс Қазақстан облысы «Коммунизм туы» (қазіргі «Дидар» газетінде) әдеби қызметкер, кейін «Лениншіл жас» (қазіргі «Жас Алаш») газетінде (1988-1984), «Жұлдыз» журналында (1974-1983) бөлім меңгерушісі, «Қазақ әдебиеті» газетінде бас редактордың орынбасары (1983-1991), 1991-1993 жж. осы газеттің бас редакторы болды.
Сабақ барысында Алтайдың асқақ жыршысы » Мұзтаудың мұзбалағы» атанған Оралхан Бөкейдің өмір жолы мен шығармашылығына арналған бейне баян көрсетілді. «Атау кере» шығармасындағы түрлі тағдырлармен туған жері Мұзтаудың табиғатын байланыстыра суреттеу жазушының асқақ ойлы екендігін оқушылар шебер тілде жеткізе білді.
Айта кетейік, Оралхан Бөкей – ұлт руханиятының көкжиегін кеңейтуге зор үлес қосқан біртуар тұлға. Қарымды қаламгер әдебиет әлеміне алғаш қадам басқан сәттен бастап шоқтығы биік шығармаларымен оқырман қауымның ықыласына бөленді. Жазушының жауһар мұралары көптеген шет тіліне аударылды, пьесалары еліміздің іргелі өнер ордаларында қойылып, көрермен көзайымына айналды. «Алтайдың Кербұғысы» атанған ерекше дарын иесінің шығармашылық жолы, азаматтық ұстанымы және қайраткерлік қасиеті – жастарға әрдайым үлгі-өнеге. Оның мол әдеби мұрасы әлі талай ұрпаққа рухани азық бола беретіні сөзсіз.
