ШЕТЕЛДІК ТӘЖІРИБЕ: ТҮРКИЯЛЫҚ ПРОФЕССОР БОТАНИКАЛЫҚ БАҚ ҚЫЗМЕТКЕРЛЕРІ МЕН СТУДЕНТТЕРГЕ ДӘРІС ӨТТІ

Өңірдегі Яссауи университетінде Түркияның Кыршехир Ахи Эвран университетінің профессоры Ахмет Казанкая арнайы келіп, Жаратылыстану факультетінің студенттеріне және Ботаникалық бақ қызметкерлеріне теория пен практиканы ұштастырған дәріс өтті. Бір айлық іс-сапар ҚР Ғылым және жоғары білім министрлігі тарапынан қаржыландырылатын Visiting Professor бағдарламасы аясында жүзеге асты.
Профессор 1-31 қазан аралығында білімгерлерге өсімдік физиологиясы және ауыл шаруашылық өндірісінің ел экономикасына үлесі, сондай-ақ Биология кафедрасының оқытушы-профессор құрамына әртүрлі тақырыптар бойынша семинарлар өткізіп, теориялық және практикалық дәрістер берді.
Бұған қоса, Ахмет Казанкая университетіміздің Ботаникалық бақ қызметкерлеріне тәжірибесімен бөлісті. Бақта орналасқан өрік, қара өрік, алма, алмұрт, жүзім, айва, сәндік өсімдіктер және бұталарды кесу, көшет отырғызу және бақшаға күтім жасау бойынша жұмыстарды практикалық түрде көрсетіп берді. Жемістерді кептіру нысанында да іс-тәжірибелер өтті.
Ол жылыжайда өсімдіктерді өсірудің артықшылықтары, экзотикалық өсімдіктер, сәндік өсімдіктер және жеміс ағаштарын кесу мен пішіндеудің жаңа әдістері, әлемдегі ауыл шаруашылығы өндірісіндегі Қазақстан мен Түркияның рөлі мен маңызын түсіндірді. Сондай-ақ осы тақырыпқа байланысты қатысушылармен өзара ақпарат алмасты.
Айта кетейік, Ахмет Казанкая университетте өткен «Топырақтың жағдайын жақсарту-адамзат денсаулығының кепілі» атты халықаралық ғылыми-тәжірибелік семинарда «Әлемдегі ауыл шаруашылығы өндірісіндегі Қазақстан мен Түркияның рөлі мен маңызы» атты баяндамасын қатысушыларға ұсынып, жергілікті телеарналарға Қазақстанның ауыл шаруашылығы туралы сұхбат та берді.
Бір ай көлемінде оқытушы-профессорлар және Ботаникалық бақ мамандарымен іс-тәжірибесімен бөліскен Ахмет Казанкая қонақжайлылық көрсеткен университетімізге алғысын білдірді.