Туған жер –әр адам баласының шыр етіп дүниеге келген жері. Сол себепті туған өлкемізге, оның мәдениеті мен салт-дәстүріне ерекше құрметпен қарау – шынайы патриотизмнің белгісі.
Түлкібас аудандық бөліміне қарасты Ә.Науаи атындағы жалпы орта мектебінің жанынан құрылған «Таң нұры» жазғы демалыс лагерінің оқушыларымен «Туған жер» бағдарламасын іске асыру мақсатында ағымдағы жылдың 9 маусым күні Азаттық ауылындағы Түркібасы әулиесіне саяхат жасалды.
Мақсат — оқушылардың өн бойына туған елге, жерге деген сүйіспеншілігін арттырып, елінің нағыз патриоты болуға тәрбиелеу. Саяхат барысында оқушылар қасиетті әулие тарихымен танысып қайтты. Осындай игі істер алдағы уақытта да өз жалғасын таба бермек.
Айта кетсек, Түркістан облысында балаларға арналған жазғы 9 лагерь өз жұмысын бастаған.Солардың бірі — Төлеби ауданына қарасты, Екпінді ауылында орналасқан «Біркөлік шатқалы» балалар лагері. 2018 жылдан бастап жұмыс істеп келе жатқан лагерьдің 250 балаға демалыс орны қарастырылған. Қазіргі таңда онда 250 бала болса, олардың 200-і Қазығұрт ауданынан, қалғаны еліміздің әр өңірінен келген балалар. Лагерьге 16 жасқа дейінгі балалар қабылданады. «Біркөлік шатқалы» балалар лагері 9 корпустан тұрады. Жаз бойы лагерьде 7 ауысым болады. Әр ауысымда 8 топ, екі тәрбиеші бар. Балалар бос уақытта бейімділігіне қарай шахмат, футбол, волейбол ойындарына қатысып, өздерінің қабілеттерін шыңдай алады. Күнделікті екі мезгіл іс-шара өтіп отырады.
Балалардың жазғы демалысын әсерлі, мәнді ұйымдастырудан бөлек, олардың қауіпсіз жағдайда демалуын қамтамасыз ету мәселесі өте өзекті. Лагерьлердегі қауіпсіздікті бірнеше органдар қамтамасыз етеді. Денсаулық сақтау министрлігі санитариялық-эпидемиологиялық бақылау қызметі орталықтардың санитарлық талаптарға сәйкестігін тексеріп, арнайы қорытынды берілген. Одан кейін төтеншеліктер өрт қауіпсіздік мәселелерін қамтамасыз етеді. Сондай-ақ, балалардың суға шомылу қауіпсіздігі қарастырылған. Ал полиция органдары болса, лагерь аумағында қоғамдық тәртіпке жауапты.
