Қазақстан Республикасы Премьер-Министрінің өкіміне сәйкес, жаз мезгілінде балалардың демалысын ұйымдастыру мақсатында биылғы 1 маусымнан бастап Төлеби ауданындағы 63 білім ордасында мектеп жанындағы лагерь жұмыс істеп тұр. Мұндай лагерьлердің жұмысы осы айдың соңына дейін жалғаспақ.
Мектеп жанындағы лагерьлерде жазғы каникулдың алғашқы айын 2780 төлебилік оқушы өткізуде. Бұдан басқа, Төлеби аудандық оқушылар үйінің ұйымдастыруымен 120 оқушыға арналған 4 аула тобы жұмыс істеуде.
Сондай-ақ, биыл білім қызметкерлері кәсіподағы аудандық комитетінің ұйымдастыруымен аталмыш кәсіподақ мүшелерінің 120 баласы жазғы демалысын жергілікті лагерьлерде өткізбек. Ал әлеуметтік статусқа ие 1 мың төлебилік оқушы «Жалпыға бірдей міндетті білім беру» қоры есебінен өз ауданындағы «Қуаныш» лагерінде демалмақ. Сонымен қатар, «Қазақстан халқына» қоры есебінен аудандағы оқу үздіктері, пән олимпиадаларының, спорт жарыстарының, өнер байқауларының жүлдегерлері, барлығы 230 оқушы Түлкібас ауданындағы «Арман», «Ерке» лагерьлерінде демалатын болады.
Айта кетейік, облыста биылғы 2022-2023 оқу жылында 17 жазғы сауықтыру лагерлері (7 мемлекеттік, 10 жекеменшік) қызмет көрсетеді деп жоспарлануда.
Осыған дейін, ҚР Премьер-Министрі Әлихан Смайыловтың төрағалығымен өткен селекторлық жиында, Оқу-ағарту министрі Ғани Бейсембаев биыл оқу жылын 3,7 млн.-нан астам оқушы аяқтайтынын айтты. Оның ішінде 11-сыныпты 172 мың түлек бітіреді. Биыл «Алтын белгіге» үміткерлер саны – 6,8 мың бала. Қорытынды емтихандар 9-сынып үшін 4 пән бойынша 2-13 маусым аралығында, ал 11-сынып үшін 5-19 маусым аралығында 5 пән бойынша өтеді.
Жазғы демалыспен және сауықтыру шараларымен 1-10-сынып оқушыларының 85%-дан астамы, яғни әлеуметтік осал санаттағы 500 мыңға жуық баланы қоса алғанда, шамамен 2,8 млн. бала қамтылады деп жоспарланып отыр. Қазіргі уақытта жазғы лагерьлерде алдағы маусымға дайындық бойынша белсенді жұмыс жүргізілуде. Жалпы 218 қала сыртындағы және 10 мыңнан астам мектеп жанындағы бейінді және шатыр лагерьлер өз есігін айқара ашады.
Мәдениет және спорт министрі Асхат Ораловтың айтуынша, жазғы демалыс аясында балалар үшін мәдениет саласы бойынша 500-ден астам, спорт және туризм саласы бойынша 300-ден астам іс-шара ұйымдастырылмақ.
«Бірнеше күннен кейін кезекті оқу жылы аяқталып, балалар жазғы демалысқа шығады. Оны пайдалы әрі қызықты өткізгісі келеді. Сондықтан біз бала денсаулығын нығайтуға, білімін толықтырып, жақсы демалуына жағдай жасауымыз керек. Әсерлі, мағыналы іс-шаралар аз. Көбіне сапасы сын көтермейді. Ауыл балаларына да қажетті деңгейде көңіл бөлінбейді. Ауыл балаларының бос уақытын тиімді өткізу ерекше назарда болуы керек. Олар үшін спорт алаңдары мен даму орталықтарын жабдықтап, ойын-сауық, мәдени іс-шараларды ұйымдастыру қажет», – деді Әлихан Смайылов.
