Көкірегі ояу, көзі ашық зиялы адам қай жерге барса да, сондағы музейге ат басын бұрғысы келіп тұрады. Өйткені мұражайлар – тарихи-ғылыми дерек ретіндегі ескерткіштерді, өнер туындыларын, мәдени құндылықтарды, сондай-ақ жергілікті жердің тұрмыс-тіршілігінің ерекшелігін көрсететін мұраларды сақтап, жинақтап, саралап, ғылыми-танымдық қызмет атқаратын орын. Мұражайлардың заттық және рухани құндылықтарды танытуда, ғылыми тұрғыда зерттеп, оның нәтижелерін насихаттауда, жас ұрпақты отансүйгіштікке, ұлтжандылыққа тәрбиелеуде, тарихи сананы қалыптастыруда маңызы зор.
Мұражай – жәдігерлер мекені, тұнып тұрған тарих. Ал тарих туған жерден басталады, сондықтан, әрбір азамат өзінің туған жерінің тарихын білуі тиіс. Еліміздің ертеңі өткен тарихпен тығыз байланыста екенін ұмытпауымыз керек.
Осы ретте Арыс қаласының білім бөліміне қарасты №1 Е.Молдабаев атындағы жалпы орта мектеп- интернатының бастауыш сынып мұғалімі Ж.Серібаеваның ұйымдастыруымен 15 оқушы орталық мұражайға саяхат жасады.
Мұражай мен орталық кітапханаға жасаған саяхат барысында оқушылар Арыс қаласының сан ғасырғы тарихымен таныс болды. Және де кемеңгер ақын Абай Құнанбаев, Мұхтар Әуезов және алаш арыстары мен қайраткер тұлғаларының өмір жолдары туралы қосымша деректерге қанықты.
Жалпы, мұражайға саяхат жасау – өрістің кеңеюіне, тұлғаның үйлесімді дамып, қалыптасуына зор ықпалын тигізеді. Сонымен қатар, оқушыларды ұлтжандылыққа, мәдениеттілікке, өз елінің тарихын құрметтеуге тәрбиелеп, шежірелі өлкенің тарихын біліп қана қоймай, оны сүйіп, құрметтеу әрбір азаматтың міндеті екендігін жете түсінуіне көмектеседі.
Мәдени тегімізді танытатын төл мұралар, шашауы шықпай жеткен жауҺарлы жәдігерлер сақталған музейдің жаңарған экспозициясы Алаштың асқақ рухын баяндап, Сыр елінің тарих тағылымын кейінгі жас ұрпаққа таныта берері сөзсіз.
