Жуырда Қазығұрт ауданының білім бөліміне қарасты С.Сейфуллин атындағы мектебінде қосымша білім беру педагогтері мен үйірме жетекшілеріне «Қосымша білім беру барысында оқушылардың бос уақытын тиімді ұйымдастыру» тақырыбында оқыту семинары болып өтті.
Оқыту семинарына 58 қосымша білім беру педагогтері мен үйірме жетекшілері қатысты. Негізгі мақсат — оқушылардың бос уақытын тиімді ұйымдастыру бағытында шығармашылыққа баулу.
Оқыту семинарында Түркістан облысы білім беруді дамыту орталығының әдіскері Каймолдаева Бақыткүл «Қосымша білім беру жүйесін дамытудың мақсаты мен ұстанымдары» тақырыбында баяндама жасады.
Содан соң Қ.Сатпаев атындағы мектеп лицейінің қосымша білім беру педагогы А.Есіркепова “Оқушылардың бос уақытын тиімді ұйымдастыруда қосымша білім берудің ролі”, Қ.Тұрсынқұлов атындағы мектеп гимназиясының үйірме жетекшісі Г.Мелдешбекова “Тоғыз құмалақ”, Д.А.Қонаев атындағы жалпы орта білім беретін мектебінің қосымша білім беру педагогы “Үйірменің үйретері көп” тақырыбында баяндамалар жасап, С.Сейфуллин атындағы жалпы орта білім беретін мектебінің қосымша білім беру педагогтері Ф.Сахова мен К.Дүйсенова шығармашылық есептерін көрсетіп, іс-тәжірибелерін бөлісті.
Қосымша білім – тәрбие үрдісін ізгілендірудің негізгі мақсаттарын оқушыларға даралап ықпал ету арқылы іске асыра алады. Қосымша білімнің бір саласы – ол музыкалық мектеп. Музыкалық мектепте білім беру жүйесі кәсіби музыкалық білім беруге, рухани адамгершілік мәдениетін жетілдіруге, эстетикалық тәрбие беруге және оқушының бос уақытын тиімді пайдалануға бағытталған. Ол үшін мектепте мынадай мақсаттарды алдыға қоямыз:
Жеке тұлғаның жоғары адамгершілік қасиеттерін дамыта тәрбиелеу;
Музыкалық кәсіби білім беру;
Шығармашылыққа жағдай жасау;
Дарынды балалардың мүмкіндігін ашу;
Азаматтық пен патриотизмге, өз Отаны – Қазақстан Республикасына деген сүйіспеншілікке, мемлекеттік рәміздер мен мемлекеттік тілді құрметтеуге, халық дәстүрлерін қастерлеуге тәрбиелеу;
Оқушының бос уақытын мазмұнды ұйымдастыру.
Олардың мұндай қабілеттерді өз бойына жинақтауына мамандық аспабы, хор, вокал, сольфеджио, ұлт-аспаптар оркестрі, қазақ музыкалық әдебиет, орыс-шет ел музыкалық әдебиеті, т.б. пәндер арқылы жүзеге асырамыз. Белгілі ақын, зерттеуші Мағжан Жұмабаев: «Тәрбие – кең мағынасымен алғанда, балаға тиісті азық беріп, сол баланың дұрыс өсуіне көмек көрсету деген сөз» – деген. Тәрбиедегі ең басты ережелер – балаға керекті кезде назар аудара білу, оған деген махаббатты қай жаста да көрсете білу, оның көзқарастарын ерекшеліктерін түсіне білу және уақытты тиімді пайдаланудың маңыздылығын түсіну. Ал уақытты тиімді пайдалану дегеніміз – жақсылыққа ұмтылу. Адам өміріндегі ең қымбаты – ол «уақыт». Бос уақытты тиімді өткізу бала тұлғасының қалыптасуына үлкен ықпалын тигізеді.
