Бүгін Түркістан облысы білім басқармасының басшысы Дінислам Болатханұлының төрағалығымен өткен аппарат жиынында балалардың жазғы демалысын ұйымдастыру және олардың қауіпсіздігін қамтамасыз ету туралы кеңінен сөз болды.
Аталған жиынға басқармадағы жауапты бөлім басшылары мен аудан/қаладағы білім бөлім басшылары зум арқылы қатысты.
– Балалардың жазғы демалысын ұйымдастыру — білім саласы үшін маңызды мәселе. Қала сыртындағы лагерлер маусым айының бірінші онкүндігінде ашылып, жаз бойы 6-8 ауысымда қызмет көрсетеді. Сондай-ақ мектеп жанындағы бір мезгілгі тамақпен қамтитын 330 лагерь ашылатын болады, -дейді Дінислам Болатханұлы.
Жиында таулы аймақтарда орналасқан мемлекет меншігіндегі жазғы сауықтыру орталықтарын ретке келтіру жұмыстары бойынша да ұсыныстар айтылды.
Айта кетейік, облыста биылғы 2022-2023 оқу жылында 17 жазғы сауықтыру лагерлері (7 мемлекеттік, 10 жекеменшік) қызмет көрсетеді деп жоспарлануда.
Осыған дейін, ҚР Премьер-Министрі Әлихан Смайыловтың төрағалығымен өткен селекторлық жиында, Оқу-ағарту министрі Ғани Бейсембаев биыл оқу жылын 3,7 млн.-нан астам оқушы аяқтайтынын айтты. Оның ішінде 11-сыныпты 172 мың түлек бітіреді. Биыл «Алтын белгіге» үміткерлер саны – 6,8 мың бала. Қорытынды емтихандар 9-сынып үшін 4 пән бойынша 2-13 маусым аралығында, ал 11-сынып үшін 5-19 маусым аралығында 5 пән бойынша өтеді.
Жазғы демалыспен және сауықтыру шараларымен 1-10-сынып оқушыларының 85%-дан астамы, яғни әлеуметтік осал санаттағы 500 мыңға жуық баланы қоса алғанда, шамамен 2,8 млн. бала қамтылады деп жоспарланып отыр. Қазіргі уақытта жазғы лагерьлерде алдағы маусымға дайындық бойынша белсенді жұмыс жүргізілуде. Жалпы 218 қала сыртындағы және 10 мыңнан астам мектеп жанындағы бейінді және шатыр лагерьлер өз есігін айқара ашады.
Мәдениет және спорт министрі Асхат Ораловтың айтуынша, жазғы демалыс аясында балалар үшін мәдениет саласы бойынша 500-ден астам, спорт және туризм саласы бойынша 300-ден астам іс-шара ұйымдастырылмақ.
«Бірнеше күннен кейін кезекті оқу жылы аяқталып, балалар жазғы демалысқа шығады. Оны пайдалы әрі қызықты өткізгісі келеді. Сондықтан біз бала денсаулығын нығайтуға, білімін толықтырып, жақсы демалуына жағдай жасауымыз керек. Әсерлі, мағыналы іс-шаралар аз. Көбіне сапасы сын көтермейді. Ауыл балаларына да қажетті деңгейде көңіл бөлінбейді. Ауыл балаларының бос уақытын тиімді өткізу ерекше назарда болуы керек. Олар үшін спорт алаңдары мен даму орталықтарын жабдықтап, ойын-сауық, мәдени іс-шараларды ұйымдастыру қажет», – деді Әлихан Смайылов.
