Жастар қоғамның қозғаушы күші. Сондықтан да, мемлекеттік жастар саясаты Қазақстан Республикасының Президентінің назарынан тыс қалған емес. Бұл бағытта ауданымызда да тиісті жұмыстар атқарылып, жастар мәселесіне ерекше көңіл бөлініп келеді.
Бүгін аудан әкімі Сәкен Сұлтанханов республикалық пәндік олимпиадаларда және байқауларда жүлдегер атанған жастармен және олардың білімін шыңдаған ұлағатты ұстаздармен кездесті. Басқосуда дарынды, талантты, білімді жастар өз ойларын еркін жеткізіп, алға қойған арман-мақсаттарымен бөлісті.
Жиында Жамбыл атындағы мектеп-лицейінің қазақ тілі мен әдебиеті пәнінің мұғалімі Қалмырзаева Майра Тұрғанбайқызы ұлылар шыққан киелі Отырардан әлі талай дарынды тұлғалардың шығатынына сенетінін айтып, ұлағатты ұстаздардан тәлім алған шәкірттердің шығар шыңы қашанда биік болатынын сөз етті. Кездесуде республикалық «Жыр алыбы-Жамбыл» атты тақырыпта жас ақындар айтысының 3 — орын иегері Сұлтан Сәуірхан арнау өлеңін оқып, ұстаздарына деген алғысын өлеңмен жеткізді.
Ұстаздар мен шәкірттердің жетістігіне тәнті болған аудан әкімі білімді жастарға қолдау көрсету арқылы олардың бойындағы мүмкіндіктерді елдің дамуына пайдалануға болатынын атап өтті.
Аудан басшысы өз сөзінде: «Киелі Отырар қашанда әлемдік өркениетке өлшеусіз үлес қосқан ғалымдар мен ғұламалардың алтын бесігі болып келгені баршаға аян. Мінекей бүгінгі күні ұлы ұстаз Әл-Фарабидің салған сара жолын жалғаған отырарлық озат оқушылар республика көлемінде биік белестерді бағындырып, абыройымызды асырып, мерейімізді үстем етіп отыр. Осындай алғыр, білімді шәкірттерді тәрбиелеуде ұлағатты ұстаздардың еңбегі орасан екенін айтып өтсек артық болмас. Дана халқымызда «Бір әріп үйреткенге қырық жыл сәлем қыл» деген терең мағыналы сөз бар. Осы сөзіміздің айқын дәлелі ұстаздардың шабыты сарқылмай шәкірт тәрбиелеуде аянбай еңбек ете береді деп сенемін»-дей келе ұлағатты ұстаздар мен білімді жастарды арнайы алғыс хаттармен марапаттап, қаржылай сыйақы табыстады.
Кездесу соңында ұлағатты ұстаздар мен оқушылар аудан әкімінің ыстық ықыласы мен құрметіне ризашылығын білдіріп, естелікке суретке түсті.
