Бүгін облыс аумағында дін саласында қызмет атқаратын имамдар мен теологтардың біліктілігін арттыру, тұрғындар мен жастар арасында рухани, адами қасиеттер мен ұлттық құндылықтарды дәріптеу, жұмыс барысында туындайтын кемшіліктердің алдын-алу мақсатында семинар өтті. Отырар аудандық мәдениет сарайының мәжіліс залында өткен семинарға аудандағы діни бірлестік филиалдарының өкілдері, мешіт жамағаттары, ауыл тұрғындары қатысты.
«Ұлттық құндылықтар – бабалар жолы» атты семинар отырысын аудан әкімінің орынбасары Айдос Құлмаханов ашып, жүргізіп отырды.
Жиын барысында Түркістан облысы «Дін мәселелерін зерттеу орталығы» КММ директоры Халыков Медет Мұзапбарұлы мен Қызылорда облысының «Дін мәселелерін зерттеу орталығы» КММ-нің теолог маманы Оспанов Бахтияр Есенкелдіұлы баяндама жасап, алдын алу, қарсы насихаттау мен оңалту ісінде дін саласындағы барлық субъектілерінің өзара байланысқан және жүйелі жұмысын ұйымдастыру қажеттілігін атап өтті.
Медет Мұзапбарұлы өз сөзінде: «Қазір діннің атын жамылған ағым да, ақпарат та өте көп. Сондықтан, қарапайым халық кімге сенерін білмей дал болады. Бұл тақырып күнделікті өмірде де, әлеуметтік желіде де жиі талқыға түседі. Шын мәнінде, қандай жағдай болмасын, атабабадан қалған асыл мұраны ұрпаққа жеткізу – бүгінгі буынның еншісінде. Мұра дегеніміз тек киіз үй, оюлы ағаш тегене, сәукеле мен шапан ғана емес, рухани байлық – ұлттық құндылығымыз»-деді.
Семинарда имамдар мен ауыл тұрғындары теле арналардағы жастардың санасын бұзатын кейбір бағдарламаларды тоқтату, мешіт имамдарына жағдай жасау, жастардың тәрбиесіне баса мән беру секілді бірқатар мәселелер бойынша сұрақтарын қойып, жұмысшы топ мүшелерінен қажетті жауаптарын алды.
Жиынды аудан әкімінің орынбасары А.Құлмаханұлы қорытындылап, ауданымызға арнайы келіп түсіндіру жұмыстарын жүргізген қонақтарға аудан халқының атынан шынайы алғысын айтты.
