«Білім сапасын ғылыми негізде көтеру» тақырыбында облысымызда өткізілген эксперименттің нәтижесі бойынша Төлеби аудандық білім бөлімінде дөңгелек үстел өтті.
Аталмыш іс-шараға Қазақстан Республикасы Оқу-ағарту министрлігінің Білім саласындағы сапаны қамтамасыз ету комитеті төрағасының орынбасары Майра Мелдебекова, Түркістан облысы әкімінің орынбасары Бейсенбай Тәжібаев, Педагогикалық ғылымдар академиясының президенті Асқарбек Құсайынов, облыстық білім басқармасы басшысының орынбасары Ардақ Садықова, басқа да азаматтар қатысты.
Дөңгелек үстел барысында «Ауыл мектептеріндегі білім сапасын көтерудің ғылыми негіздері», «Білім сапасын көтеруде білім ұйымында ішкі резервті пайдаланудың тиімділігі», «Білім сапасын ғылыми-тәжірибелік негізде арттыру – бүгінгі күннің басты талабы», «Білім сапасын арттырудағы педагогтың ролі», тағы басқа тақырыпта мазмұнды баяндамалар оқылып, сұрақтар қойылды, пікір алмасылды.
Жалпы, білім беру сапасын үш жағдайды ескере отырып жақсартуға болады. Біріншіден, білім беру жүйесінің қарастырылып отырған кездегі нақты жағдайын, жетістіктері мен кемшіліктерін анықтау керек; екіншіден, оқыту нәтижелерін жақсарту үшін қандай жұмыстар атқару қажеттігін тұжырымдау керек; үшіншіден, әр елдің орта білім беру жүйесінінің ерекшелігін, тарихын, мәдениетін, саясаты мен құрылымын ескере отырып, атқарылуы қажетті іс-шаралар кластерін дайындап, іске асыру керек.
Еліміз алғаш рет 2007 ж. TIMSS зерттеуіне қатысты. Бұл зерттеуге бізден тек 4-сынып оқушылары ғана қатысып, математика пәні бойынша 5-орын, жаратылыстану пәні бойынша 11-орын алда. Бұл жақсы көрсеткіш болды, халық қуанды. Ал 2011 ж. зерттеуге 4 және 8-сынып оқушылары қатысты. 4-сынып оқушылары сәйкесінше 27-ші және 32-орындарды иеленіп, 4 жылда білім сапасының 22 және 21 сатыға төмендеп кеткенін, ал 2007 жылы 4-сыныпта оқыған оқушылар 2011 жылы 8-сыныпқа келгенде, олар осы пәндерден сәйкесінше 17-ші және 20-орындарды иеленіп, өздерінің білім сапасын 4 жылда 12 және 9 сатыға төмендетіп алғандарын көрсетті. Бұл жақсы нышан емес.
PISA зерттеуіне еліміз 2009 және 2012 жылдары қатысты. Қазақстандық оқушылар оқу сауаттылығы бойынша осы жылдары 59-шы және 63-орындарды, математикалық сауаттылық бойынша 53-ші және 49-орындарды, ал жаратылыстану-ғылыми сауаттылықтары бойынша 58-ші және 52-орындарды иеленді. Бұл нәтижелер Экономикалық ынтымақтастық және даму ұйымы елдері бойынша орташа нәтижеден көп төмен.
Ал өңірде қолға алынып жатқан іс шаралар сауаттылықты арттыруға сеп болмақ.
