Түлкібас ауданы әкімдігі мен аудандық адами әлеуетті дамыту бөлімінің ұйымдастыруымен, Түркістан облысы әкімінің орынбасары Бейсенбай Тәжібаевпен бекітілген кәмелетке толмағандардың қатысуымен жасалынатын қылмыс пен құқық бұзушылықтың және оқыс оқиғалардың алдын алу бойынша ата-аналармен жергілікті жерлерде кездесудің жоспар кестесіне сәйкес Тұрар Рысқұлов ауылы аудандық мәдениет сарайында және «Жаскешу» ауылдық мәдениет үйі мен Балықты ауылдық мәдениет үйінде кездесу өткізілді.
Аталған жиынды Түлкібас ауданы әкімінің орынбасары Орманов Ербол Керімбекұлы кездесудің мақсат міндеттерімен таныстырып, жүргізіп отырды. Жиынға Түркістан облысы білім басқармасы тәрбие және қосымша білім беру бөлімінің басшысы Маханбетов Жандос Маханбетұлы, Түркістан облыстық ардагерлер кеңесінің өкілі Байғұтов Нышан Тасболатұлы , Түркістан облысының дін істері басқармасының дін мәселелері бойынша зерттеу орталығының басшысы Жорабек Жалғас Мұхтарұлы, Түлкібас ауданы білім бөлімінің басшысы Кадырбек Ержан Изтайұлы, Түлкібас ауданының Төтенше жағдайлар бөлімі аға инженері, азаматтық қорғау аға лейтенанты Қазбек Мадияр Қанатұлы, Түлкібас ауданы ата-аналар кеңесінің төрағасы Миразизов Мырсалы Фузаилович, ауыл әкімдері, мектеп директорлары, мектеп директорының тәрбие ісі жөніндегі орынбасарлары, педагог-психологтар, ата-аналар кеңесінің төрағалары, «Әкелер мектебінің» төрағалары, мұғалімдер, ата-аналар қатысты.
Жиын барысында бала құқығы бойынша баяндама оқылды. Баяндамашылар қоғамда орын алып жатқан жағдайлар мен мәселенің маңыздылығы туралы өз ойларын ортаға салды. Қазіргі қоғамның алдында тұрған басты міндеттердің бірі- балалар мен жасөспірімдер арасындағы құқық бұзушылықтың алдын алу , кәмелетке толмағандар арасындағы қылмыстың өсуіне жол бермеу. Бұл мәселе бүгінде көкейтесті мәселелердің біріне айналып отыр. Өрімдей жастардың қылмыс жасауы көз үйренген көрініске айналып , елді елең қылуда. Тәртібі қиын бала есейген сайын қылмыстың ауыр түрлерін жасауға бейімі арта беретінін ескерсек , бұл мәселеге қоғам болып жұмыла жүйелі жұмыс жасау керектігі айтылды. Кездесуге жиналған ата-аналар сұрақтар қойып, өз ұсыныстарын айтты.
