Бүгін Созақ ауданының әкімі Мұхит Тұрысбеков аудан орталығындағы бірқатар білім ошақтарындағы «1 маусым – Халықаралық балаларды қорғау күні» мерекесімен қатар өткен мектеп бітірушілердің салтанатты жиынына қатысты.
— Міне, бүгін тағы бір оқу жылын сәтті аяқтап отырмыз. Ұстаз – ұлағатты есім. Шәкірттерін білім нәрімен сусындатып, тәлім-тәрбие беру, жақсы қасиеттерді бойына дарытып, адамгершілік рухта бағыт-бағдар беруде ұстаздың еңбегі зор. Осындай ұстаздардан тәлім-тәрбие алған бітіруші түлектерді оқу жылының сәтті аяқталуымен шын жүректен құттықтаймын. Балалықпен қоштасып үлкен өмірге қадам басасыздар. Алдардыңызда үлкен өмір жолы тұр. Отанымыздың озық оқу орындарында білім алып, еліміздің қажетті мамандық иесі атанды деп сенемін,- деді аудан басшысы.
Айта кетейік, 2022-2023 оқу жылында аудан мектептерінде 1-сыныпқа 1540 оқушы қабылданып, 15433 оқушы білім алды.
Бүгінгі таңда 937 оқушы мектеп бітіргелі отыр. «Алтын Белгіге» 53 оқушы, «Үздік аттестатқа» 90 оқушы үміткер ретінде ұсынылып отыр.
Сондай-ақ, аудан әкімі, 1 Маусым – Халықаралық балаларды қорғау күні мерекесімен барша бүлдіршін, балаларды құттықтап, ізгі тілегін білдірді.
Айта кетсек, Түркістан облысында биыл 29 491 оқушы мектепті аяқтайды. Оның ішінде ұлттық бірыңғай тестілеуді тапсыруға өтініш бергені — 21 065. Бұл туралы өңірлік коммуникациялар қызметінде өткен брифингте облыстық адами әлеуетті дамыту басқармасының басшысы Дінислам Болатханұлы мәлімдеді.
2022-2023 оқу жылында 11 сыныпты бітірген түлектердің ішінде 1416 оқушы «Алтын белгіге» үміткер болса, 2355-і «Үздік аттестат» алуға үміттеніп отыр.
«Жалпы өңірдегі Түркістан мен Сарыағаш қалаларында және Жетісай, Созақ, Сайрам аудандарында «USTUDY» тестілеу орталықтары орналасқан. Онда ҰБТ 2 лек бойынша компьютерлік форматта өткізіледі. Орталықтарда 12 аудиторияда 600 компьютерлік орын дайындалған. Ұлттық бірыңғай тестілеу цифрлық форматқа өткізіліп, жылына 4 рет тапсыру мүмкіндігі берілді. 11 сынып бітірушілері қаңтар айынан бастап ЖОО-на түсе алады. Мемлекеттік грантқа түсу үшін тіркелу — 28 сәуір мен 14 мамыр аралығында жүргізілді. Ал мемлекеттік грантқа түсу үшін тест тапсыру мерзімі 18 мамыр мен 5 шілде аралығында жүргізіліп жатыр. Тестілеу барысы толығымен бейнежазбаға түсіріліп, бейнекамералар Ұлттық тестілеу орталығымен бақылауға алынған. Қазіргі таңда тест тапсырғандар – 4357, шығармашылық емтихан тапсырғандар – 614, тестілеуге қатыспағаны – 79», — деді басқарма басшысы.
ҰБТ ережесіне сәйкес ғимаратқа кіргізу немесе тестілеу барысында тыйым салынған заттар анықталып, ғимараттан немесе тестілеуден шығарылған болса, ҰБТ-ны тапсыруға екінші мүмкіндік берілмейді.
