Ғасырлық тарихы бар киелі шаңырақ ата-ана мейірімі мен қамқорлығын аңсаған мыңдаған бүлдіршіндерді бауырына басып, тәрбиелеп келеді. Әр түрлі ұлттың балғындары тату-тәтті өмір сүріп, ынтымағы жарасып отыр. Жетім және ата-анасының қамқорлығынсыз қалған қаракөз бүлдіршіндеріміздің өмір сапасын жақсарту жолында мемлекет тарапынан оңды шешімдер мен игі істер жасалынуда.
Жүз жылдық тарихы бар киелі шаңырақтан ұшқан түлектер бүгінгі таңда өмірден өз орындарын тауып, жетістіктерге жетуде.
Балғын бүлдіршіндердің ең қуанышты және жыл сайын күтетін басты мерекесі 1- Маусым – Халықаралық балаларды қорғау күніне арналған «Бақытты балалық шақ» атты мерекелік іс-шара кең көлемде аталып өтті.
Іс-шараға Арыс ауданының бас прокуроры Сейдуалиев Талғат Сатышұлы өз ұжымымен бірге келіп, балаларды айтулы мерекемен құттықтады. Осылайша бүлдіршіндерге қызықты да, көтеріңкі көңіл-күй сыйлап, белсенді тәрбиеленушілерді «Алғыс хаттармен» марапаттап, сыйлықтарын табыстады. Кішкентай бүлдіршіндерді Арыс қаласындағы «Хан» ойын-сауық орталығына апарды, онда балалар түрлі ойындар ойнап, шат-күлкіге бөленді. Сонымен қатар, балаларға арнап меркелік дастархан жайылды.
Айта кетсек, Түркістан – дарынды, білімді, өнерлі балаларымен мақтанатын ерекше өңір. Биылғы оқу жылында өңірімізде 500 мыңнан астам бала білім алды. Облысымызда 1000-шы мектеп ашылды. Ел Президентінің тікелей қолдауымен балаларға, өскелең ұрпаққа жағдай жасау үшін игі бастамалар қолға алынып жатыр. Алдағы 3 жылда облыста 96 мектеп бой көтереді. Биыл облыс мектептеріне 101 автобус бөлініп, 71-і тапсырылған болатын. Ал мерекеге орай,30 автобус берілді. Жазғы демалыста 26 мыңнан астам баланы демалыс лагерьлеріне жіберу жоспарланған. Түркістан өңірінде «Қауіпсіз мектеп» жобасы жүзеге асырылады. Балалардың дамуына, білім алуына жан-жақты жағдай жасау жалғасады.
