Созақ ауданы білім бөлімінің С.Сейфуллин атындағы жалпы орта мектебінде «Coworking» орталығы ашылды. Оқушы, ата-ана, мұғалім арасындағы ынтымақтастықты нығайту, оқушыларды кітап оқуға тарту мақсатында ашылған орталықты мектеп директоры Сейтқазиева Бақтыгүл Ғаниқызы құттықтау сөзімен бастады.
Орталықты ашудағы мақсат — әлеуметтік маңызы бар бастамаларды, жобаларды және бірлесе жұмыс жүргізу үшін жастардың қолжетімді жұмыс кеңістігін ұйымдастыру. Коворкинг орталық төрт аймаққа бөлінген: іскерлік қатынас аймағы, бейресми кездесулер аймағы, демалыс аймағы және жеке жұмыстар жасауға арналған алаң.Коворкингтің ең тартымды аспектісі — креативті орта және пікірлес мамандар қауымдастығының құрылуы. Қазіргі таңда коворкинг орталығы жастарға берері мол. Кез-келген сала бойынша білімін жетілдіріп, ақпарат алуларына болады.
«Coworking» – ағылшын тілінен аударғанда «бірлесе жұмыс істеу» деген мағынаны береді. Яғни, бұл адамдардың әңгіме-дүкен құратын, оқып-үйренетін, жеке және топтанып келіп жұмыс істейтін, кеңесетін орнына айналуда. Басты мақсат – кітапханаға оқырманды, әсіресе жастарды көбірек тарту. Мұнда балалар тек кітап оқумен ғана шектелмей сүйікті істерімен яғни тоғызқұмалақ, шахмат, дойбы ойындарын ойнап, ән тыңдап, әртүрлі шаралар өткізіп әлеуметтік желіден қажетті ақпараттарын ала алады. Бұл жерден оқырман кітаптың баспадан шыққанын да, электронды түрін де оқи алады. Қажет десе, интернеті де бар, тегін. Кітап оқимын деген оқырманға барлық ыңғайлы жағдай қарастырылды.
Сабақтан тыс уақытта оқушылар көркем әдебиеттер оқуға, сыныпаралық дебаттар, дөңгелек үстелдер, ойталқы пікір сайыстар өткізеді.
Оқырмандар белсенділерімен бірігіп шығарма кейіпкерлердің образдарын талдап отырады. Бұл шаралар баланың ой-өрісін жан-жақты дамыту, өзіндік ойын, пікірін ортада еркін айтуға жетелейді. Орталықтың балаға қажеттілігі жайлы тәжірибелі ұстаздар дәйекті мысалдармен айта келе, болашақта жалғасын табатындығына сенім білдірді.
Салтанатты ашылу рәсімі мектеп өнерпаздарының өнерімен жалғасты. Орталықтың берері мол, болашағы зор, алар асуы биік боларына сенімдіміз.
