Түлкібас ауданының білім бөлімінің әдістемелік кабинетінің жылдық жоспарына сәйкес, Б.Садықов атындағы ЖОМ-нің базасында «Байтұрсынов-ұлтымыздың ұлы ұстазы» атты облыстық ғылыми жобалар байқауының аудандық кезеңі өткізілді.
Байқауға білім беру ұйымдарының 8-11 сынып оқушылары қатысты. Аталмыш іс-шара Ахмет Байтұрсыновтың 150 жылдық мерейтойына арналды.
Байқаудың мақсаты- қатысушылардың тіл білімінің негізін салушы, ұлт ұстазы Ахмет Байтұрсыновтың еңбектеріне деген қызығушылығын арттырып, ғылыми көзқарасы мен дүниетанымын қалыптастыру, тіл білімі мен әдебиеттану ғылымын дамыту мен дарынды балаларды анықтау болып саналады.
Жалпы жоба 3 бағыт бойынша өткізілді. Байқауға қатысушылардың жұмыстары ғылыми жобаға қойылатын талаптар мен рәсімдеуге қойылатын талаптарды негізге ала отырып және бағалау критерийі бойынша бағаланды. Байқау нәтижесі бойынша жоғары балл алған Т.Рысқұлов атындағы ЖОМ-нің 10-сынып оқушылары мамыр айының 2-ші онкүндігінде өткізілетін облыстық кезеңге жолдама алды.
Еске алсақ, былтыр Түркістан облысында «Ахмет Байтұрсынов – ұлтымыздың ұлы ұстазы» атты облыстық ғылыми жобалар байқауы өткен еді. Түркістан қаласындағы «Халықаралық туризм және меймандостық университетінде» жас жеткіншектердің тіл білімінің негізін қалаушы, қоғам қайраткері Ахмет Байтұрсыновтың ұлт үшін сіңірген еңбектерін зерделеп, ғылыми көзқарасы мен дүниетанымын қалыптастыру мақсатында 8-11 сынып оқушылары арасында «Ахмет Байтұрсынов – ұлтымыздың ұлы ұстазы» атты облыстық ғылыми жобалар байқауы ұйымдастарылған болатын. Байқау барысында жас зерттеушілер, тұлғаның ақындық қырына, тіл-әдебиет ғылымына қосқан өлшеусіз еңбегіне, ұлтым деп соққан жүрегінің лүпілін түйсінуге жетелеу мақсатында А.Байтұрсыновтың ақындық әлемі; А.Байтұрсынов және қазақ әдебиеті; А.Байтұрсынов – қоғам қайраткері атты 3 бағытта ғылыми жобаларын ұсынған. Байқауға 15 аудандық және 9 мамандандырылған білім беру ұйымдарынан жалпы 62 оқушы қатысқан еді.
