Түркістан облысы әкімінің кеңесшісі Еркебұлан Дауылбаев Сарыағаш ауданына «Жайлы мектеп» ұлттық жобасы аясында құрылысы жоспарланған мектептерге бөлінген жерлермен танысу үшін іс-сапарымен келді. Аудан әкімі Арман Абдуллаев пен Дәулет Акатов құрылысы жоспарланып отырған, Дербісек, Қызылжар ауылдық округтерінде және Сарыағаш қаласы, Самал-3 мөлтек ауданы және Б.Оспанов көшесі бойына түсетін мектептердің құрылыс жоспарлары мен жер учаскелерін көрсетті. Аралау барысында, Түркістан облысы әкімінің кеңесшісі Е.Дауылбаев:
— Мемлекетті дамытатын жастарды тәрбиелеу үшін білім саласына айрықша қолдау көрсетіліп жатыр. Мемлекет басшысының арнайы тапсырмасы бойынша қолға алынған «Жайлы мектеп» жобасы аясында Сарыағашта 10 мектептің құрылысы жүреді. Елді мекен аумағынан «Жайлы мектеп» құрылысына бөлінген жерлерді талапқа сай жер учаскелеріне ауыстыру қажет. Сонымен қатар, инфрақұрылым жүйелерінде кемшілік болмау маңызды,- деп айтып өтті.
Айта кетсек, жалпы Түркістан обылысы бойынша 63 мектептің, оның ішінде аудан аумағында 2023-2025 жылдарға 10 мектептің құрылысы жоспарланған. Жайлы мектептің басқа мектептерден ерекшелігі жоғары стандартқа сай заманауи үлгіде құрылысы жүргізіліп, жаңа білім стандартына сәйкес оқушылар білім алатын болады. Ұлттық жобаның басты мақсаты — мектептердегі орын тапшылығын болдырмау, апатты жағдайдағы және үш ауысымды мектептер мәселесін түбегейлі шешу. Мемлекет басшысының тапсырмасымен жүзеге асырылатын жоба апатты жағдайдағы және үш ауысыммен оқитын мектеп мәселесін толық шешеді. Сондай-ақ ауыл мен қала мектептерінің айырмашылығы едәуір азаяды. Типтік мектептерде пәндік кабинеттер, компьютерлік сыныптар, зертханалар мен шеберханалар — бәрі бірыңғай стандарттар негізінде жабдықталады. Оқушыларға ыңғайлы болу үшін трансформер-парталар қойылады. Тынығу алаңдары болады. Балалардың қауіпсіздігін қамтамасыз етуге де жағдай жасалады. Дабыл түймесі, бейнебақылау жүйесі орнатылмақ. Жайлы мектептердің басты ерекшелігі, олар бірыңғай стандарттар бойынша жобаланады. Яғни, ауылда да, қалада да жаңа бірыңғай стандарт бойынша салынады.
Айта өтейік, бастауыш және жоғары сынып оқушылары мектепте бөлек блоктарда оқиды. Әр блокта оқу кабинеттері, дәретханалар, спорт залдар болады. Ерекше қажеттіліктері бар балалар үшін де қолайлы жағдай қарастырылады. Зәулім мектептер заманауи интерьер бойынша жобаланып, безендіру талғамға сай болады.
