«Қазақстан халқының бірлігі күні» мерекесі қарсаңында «Қазақстан Республикасының салалық білім және ғылым қызметкерлері кәсіптік одағының» Түркістан облыстық ұйымына кіретін «Шапағат-педагог» білім қызметкерлері кәсіподағына мүше, Сайрам ауданы адами әлеуетті дамыту бөліміне қарасты «Оқу-өндірістік комбинат» коммуналдық мемлекеттік мекемесінде «Қазақстан – татулық пен достықтың киелі бесігі» атты іс-шара өтті.
Мерекелік кездесуге «Қоғамдық келісім» КММ-і Сайрам аудандық филиалының басшысы Айтбаев Базарбай, аудандық этномәдени бірлестіктердің төраға мен төрайымдары, зиялы қауым өкілдері, және «Оқу-өндірістік комбинат» коммуналдық мемлекеттік мекемесінде білім алатын оқушылар қатысты.
Алғы сөзде «Қоғамдық келісім» КММ-і Сайрам аудандық филиалының басшысы Базарбай Айтбаев бірліктің маңызындылығын айтып, «Қазақстан – татулық пен достықтың киелі бесігі» тақырыбында баяндама оқыды.
— Дүниежүзінде көптеген этнос өкілдері мекен ететін мемлекеттер аз емес. Солардың арасында 130-дан астам ұлт пен ұлыс ұйыса ғұмыр кешіп жатқан Қазақстанның алатын орны ерекше. Тіпті, біздің Отанымыз әлемдік аренада бірлік пен татулықтың символы ретінде бағаланып та келеді. Сол себепті, ондаған жылдар бойы мемлекеттік деңгейде тойланып келе жатқан «1 мамыр — Қазақстан халқының бірлігі күні» мерекесінің мәні мен маңызы айрықша. Бір сөзбен айтқанда, бұл – ел ішіндегі түрлі этнос пен дін өкілдерінің арасындағы қарым-қатынасты нығайтып, сый-құрметті арттырып, татулық, бірлік пен ортақ құндылықтарды насихаттауды мақсат еткен мереке.
Келесі құттықтау сөз кезегінде «AMANAT» партиясы Сайрам аудандық филиалының төрағасы Алмас Абдикадиров жергілікті жерде ынтымақтың сақталуына ауыл тұрғындарының қосып отырған елеулі үлестері үшін алғысын білдірді.
Жиында ақсақалдар мен этнос өкілдері тарапынан келелі ойлар айтылды.
Мұнан кейін, оқушылар мәнерлеп өлең оқып, аудандық мәдениет үйінің өнерпаздары тамаша өнер көрсетіп, көпшілікке көтеріңкі көңіл-күй сыйлады.
