Кітапхана — оқырман үшін үлкен тәрбие мектебі, сансыз сұрақтардың жауабын табуға болатын сиқырлы да киелі орда. Бәсекеге қабілеттіліктің басты көрсеткіші, білімнің кәусар бұлағы – кітап екені белгілі. Кітап дегеніміз – алдыңғы буынның кейінгі ұрпаққа қалдырған рухани өсиеті.
Кітап – шебер ұстаз, тілсіз мұғалім. Кітап – жан айнасы, оған қарап ойыңды да, бойыңды да түзетуге болады, оған қарап оғаш мінезіңді, ерсі қылығыңды мінейсің, тұрпайы пейілді көріп жиренесің, түзейсің. Айналадағы адамға мейіріммен қарауға үйренесің. Кейде жаңсақ, жаңылыс басқан қадамдарың болса, оны оп- оңай аңғарасың.
Кітап – тар үйіңнен кең дүниеге алып баратын ұлы арна. Ол тар пейіліңді кеңейтеді, әуел бастағы тар жолдан кең адамдық жолыңа түсіреді.Кітап арқылы үйіңде отырып, бүкіл дүниені болжап көресің, бүкіл дүниемен сөйлесесің. Кітап сені кең әлеммен, кең дүниемен жалғастырады.Қазақ: «Ырыс ауысады, білім жұғысады», — дейді. Расында да білім біреуден-біреуге жұғысады. Осыны білетін халық: «Білмегенді білгеннен сұрағанның айыбы жоқ, сұрамасаң, білмейсің», — дейді. Сенің білмегеніңді алғаш сұрап білетін ғалым досың да – кітап.
Осы тұста, Түлкібас ауданының адами әлеуетті дамыту бөлімінің «Оқуға құштар мектеп» жобасын іске асыру шеңберінде білім алушыларға кітап оқудың маңыздылығын насихаттап, білім алушыларды оқуға тарту, кітаптың құндылығын ұғындырып, үздік оқырманды анықтау мақсатында ұйымдастырылған «Үздік оқырман — 2023» аудандық байқауына Ш.Уәлиханов атындағы шағын жинақты жалпы орта мектебінің 8-сынып білім алушысы Мусабекова Анель қатысып, аудан бойынша жүлделі ІІІ-орын иеленді. Кітапхананың ең үздік деген оқырмандары өздерінің кітапханаға тіркелгеннен бастап осы кезге дейін оқыған кітаптары, ең сүйікті шығармалары, кітап оқуға көзқарастары туралы кеңінен әңгімелеп, өзара пікір алысты. Кітапхана қызметкерлері түрлі логикалық сұрақтар мен ойындар ұйымдастырып оқырмандарға көтеріңкі көңіл-күй сыйлады.
