Елімізде «Бизнестің жол картасы – 2025» бағдарламасы аясында мемлекеттен берілетін қайтарымсыз 5 млн-ға дейінгі грант талай кәсіпкердің кәсібін дөңгелетуге себеп болып отыр. Ұлттық жоба шеңберінде жаңа инновациялық жобаларды іске асыруға арналған грантты ұтып алған шымкенттік кәсіпкерлер көп. Шымкент қалалық кәсіпкерік және индустриалды-инновациялық даму басқармасы журналистерге арнайы пресс- тур ұйымдастырды.
Мемлекеттік грант алып, кәсібін бастаған азаматтың бірі – Әлібай Жұмабаев. Ол басшылық жасайтын «Business Plas» ЖШС пенопласт шығарады. Былтыр грант аясында ұтып алған 5 млн. теңгеге цех басшысы полестерол түйіршігін қайнататын қазандық алған. Бұл күнде серіктестік қала тұрғындарын жұмыспен қамтып отыр.
– Мемлекеттен алған қаржы ісімізді алға жылжытты. Осы кәсіптің арқасында 5 адамды жұмыспен қамтып отырмыз. Жұмыстың бәрі автоматтандырылған. Жұмысшыларды арнайы оқытып, дайындадық. Қазір қалада 4-5 пенопласт шығаратын осындай кішігірім цех бар. Ол қаланың сұранысын толық қамти алмайды. Болашақта цехты кеңейтіп, өнімнің саны мен сапасын арттырсақ деген жоспарымыз бар, – дейді Әлібай Жұмабаев.
Шағын цехта қазіргі таңда 5 адам жұмыс істейді. Барлық жүйе автоматтандырылған, тек операторлар жұмыс барысын бақылап отырса болғаны. Бүгінге дейін 10 мың куб дайын өнім шығарған. Ал жалпы тапсырыстың басым бөлігі құрылыс салып жатқандардан түсетін көрінеді.
Ержігіт Қуандық, оператор: «Менің жұмысым сырьены тартып алу төбеге 5 секундқа. Сөйтіп дозатордың ішіне түсіріп, осыны қайнатып шығарамын. Бесінші, 22-де бір бункер толады. Үш марка болады, 12, 25, 35, 50-лік. Біз қазір 15-ті қайнатып жатырмыз.»
Бүгінде Шымкент қаласында мұндай кәсіппен айналысатындар көп емес. Әлібай Жұмабаев сол себептен де тапсырыс берушілердің күн санап артып келе жатқанын айтады. Сөзінше, ол алдағы уақытта цехты кеңейтуді жоспарлап отыр.
Қазіргі таңда Шымкентте қайтарымсыз грантқа құжат қабылдау жүріп жатыр.
– Қайтарымсыз қаражат мамыр айынан беріле бастайды. Грантқа құжаттар қабылдау әлі де жүріп жатыр. Қаржылай қолдау алған соң жоспарға сай пайдалану қажет. Басты талап – осы. Мемлекет тарапынан қайтарымсыз көмек алғандар қатарында заң бұзушылықтар да анықталып жатыр. Мемлекеттік қолдауды мақсатсыз пайдаланғандардың қаржысын сот арқылы қайтарамыз, – дейді Шымкент қаласының кәсіпкерік және индустриалды-инновациялық даму басқармасының жеке кәсіпкерлікті қолдау және дамыту бөлімінің басшысы Үсен Исаев.
Айта кетейік, мегаполисте 2019 жылдан бері жаңа бизнес-идеясын қорғаған 170 адам қайтарымсыз қаржыға ие болған. Бұл мақсатқа 700 млн теңге қаржы қарастырылған.
