Бұл туралы баспасөз туры барысында қалалық энергетика және инфрақұрылымды дамыту басқармасы басшысының орынбасары Арман Әбдіқалықов мәлімдеді. Қазіргі таңда, 9 нысанда ауыз су жүйесінің, 8 елді мекенде электр желісінің, ал, 14 шағын ауданда көгілдір отын тарту жұмыстары жүргізілуде.
Қала халқының бүгінде 98,5 % таза ауыз сумен қамтылған. Ал, қалған 2,5 % биылғы жылдың жоспарына енгізіліпті. Осы орайда, 5 елді мекенде құрылыс жұмыстары қарқынды жүргізілуде. Олар, Сайрам 1,2, Қайнарбұлақ, Құрсай, Еңбекші ауданының жаңа құрылыс аумағы мен Сайрам 3 шағын ауданы.
Дәл қазіргі таңда, 9 нысанда ауыз су жүйесінің құрылысы жүргізілуде. Оның 4-еуі яғни, Шымситидегі суаққы мен ВС-1-дегі қайта құру жұмыстары, сонымен қатар, Бозарықтың жаңа құрылысы мен гидрогеолог жұмыстар келесі жылдың еншісіне қалдырылып отыр екен. Баспасөз туры барысында жыр болған Қайнарбұлақтағы жарық жүйесі таныстырылды. Бүгінде 90 пайыз құрылыстың аяқталғанын жеткізген басқарманың сол аумаққа жауапты жетекшісі, бұйыртса, мамыр айында абоненттеуді бастаймыз деп отыр.
Қайнарбұлақпен қатар, қалада 7 елді мекенде сапалы жарық жүйелерін тарту жұмыстары жүргізілуде. Атап айтар болсақ, олар Нұрсәт, Түркістан, Батыс, Тұран, Ақжар, Бозарық пен Асардың жаңа құрылыс аумақтары. Биыл аталған шағын аудандардағы құрылыстар аяқталып мемлекеттік қуат көзіне қосылады деп күтілуде. Нәтижесінде, қала халқының 100 пайызы сапалы жарыққа қол жеткізбек. Тілшілерге таныстырылым барысында табиғи газ жайында сөз қозғаған жауапты басқарма басшысының орынбасары 14 нысанда құрылыс жүріп жатқанын жеткізді.
Көгілдір отын құбырлары тартылып жатқан 4 елді мекендегі құрылыс келесі жылға өтпелі. Олардың қатарына тағы да 2024 жылы 8 нысан қосылады деп күтілуде. Осы орайда, 2025 жылы миллионды қала толықтай табиғи газбен қамтылады деген жоспар бар. Ал, кәріз жүйесі тартылып жатқан 12 елді мекеннің 8-індегі құрылыс биыл аяқталып, 60 пайызды құраған көрсеткіш 65 пайызға өсетін болады. 2025 жылға дейін қала халқының кәріз жүйесімен қамтылу деңгейі 75 пайызды құрайды деп жоспарлануда.
