Мемлекет басшысы Қасым-Жомарт Тоқаев Қазақстан халқына жолдаған кезекті Жолдауында сапалы білім беруге аса мән берді. Коронавирус індетінің салдарынан қашықтан оқуға көшкен мектеп оқушылары мен студенттердің оқыту ісін ұйымдастыруда кеткен қателіктерді де ашып айтты. Нақты бір онлайн-платформаның жоқ екенін алға тартып, осы бағытта шұғыл тапсырма берді.
Сондай-ақ, «санитарлық талаптарды сақтай отырып, білім алудың қалыптасқан дәстүрлі тәсіліне қайта көшудің тәртібін әзірлеген жөн», — деді.
Қуанарлығы да — осы. Енді дәстүрлі оқу тәртібіне оралатын кез алыс емес. Алдағы уақытта балаларымыз қалыпты жағдайда білім алады.
Дегенмен мемлекет басшысы сақтық шараларын әлі де естен шығармауды нықтап тапсырды. Себебі індетпен күресті жекелеген түрде күшейту керек. Өйткені дүниежүзілік денсаулық сақтау ұйымының болжауы бойынша пандемиямен кем дегенде екі жыл күресуге тура келеді. Індеттің қазіргі ахуалына тоқталған Президентіміз бұл бағыттағы атқарылған жұмыстарды да тілге тиек етті.
Осылайша биылғы Жолдау көпшіліктің көкейіндегі мәселені қозғап, оның шешілу жолдарын ұсынған нақты құжат болды. Енді Жолдауда айтылған өзекті мәселелер шешімін өз уақытында табатынына сенім білдіремін.
Нұрлыбек ОМАРОВ,
М.Әуезов атындағы ОҚУ филология факультеті, қазақ тілі мен әдебиеті кафедрасының меңгерушісі
