Шымкентте жоғары білім ордасының студенттері мен мектеп оқушылары ғылыми жобаларын таныстырды. Көрмеге жастардың ІТ технология мен робототехникадағы жетістіктері, жасыл экономиканы дамытудың ғылыми ізденістері қойылды. Аталмыш іс-шара М. Әуезов атындағы ОҚУ-нің ғылым күніне орай ұйымдастырылған онкүндік аясында болып өтті.
Ақыл –жастан. Жас ғалымдардың көрмеге ұсынылған жобасында электр энергиясын үнемдеу тетіктерін зерттеп, жарық өндіру технологиясын дамытуға ден қойғанын аңғаруға болады. Олар өскіндердің фотосинтез құбылысы арқылы электр тогын өндіруге болады,-дейді. Сондай-ақ мектеп жасындағы Нұрасыл Есбол жасанды интелектке ие протез өнертабысын ұсынды.
— Мысалы осы бионикалық қолды салады қолы жоқ адамдарға. Сөйтіп тамыр датчигімен адам өзі сезіп басқара береді қолын. Алған бетімнен қайтпаймын. Алда тағы да болады. Сол жолы осыны дамытып, әрі қарай практикалық тұрғыда кигізіп көрсетемін,- деді №80 ІТ мектеп- лицейінің оқушысы Нұрасыл Есбол.
Мүгедектігі бар азаматтарға арналған «Бионикалық қол» жобасы қалалық, республикалық олимпиадаларда жүлдеге іліккен үздік жұмыс. Мұхтар Әуезов атындағы Оңтүстік Қазақстан университеті ғылымға арналған 10 күндік аясында осындай үздік жоба авторларына білім гранттарын ұсынып отыр.
— Ғылым күніне арналған 10 күндіктің ішінде біз жастарды, мектеп оқушыларын, жас ғалымдарды және өзіміздің академиктер мен ғылым докторларының колобарация жүйесін ортақтандырып, тағы да бір жаңа ойлардың, тұжырымдамалардың пайда болуына әсер жасамақпыз,- деді М.Әуезов атындағы Оңтүстік Қазақстан университетінің ректоры Дария Қожамжарова.
Аталмыш шара сәуірдің 17 –не дейін жалғасады. Онкүндік аясында 35 тұлға туралы қысқа бейнероликтер көрсетіледі. Үздік атанған студенттерді университеттің профессорлары, елімізге танымал ғалымдар марапаттайды. Бұл аға буын мен кейінгі буынның арасындағы ұрпақтар сабақтастығын айғақтайды.
