Зейнетақы төлемдерін тағайындау туралы ақпарат әр кезде де өзекті. Бұл қызметті рәсімдеу жолдарын «Азаматтарға арналған үкімет» Шымкент қалалық филиалының өкілдері түсіндіріп берді.
Қазір Шымкент қаласында 87 мыңнан астам зейнеткер тұрады. Зейнетақы, оның ішінде базалық және БЖЗҚ төлемдері мемлекеттік корпорацияға жүгінген күннен бастап тағайындалып, өтінішті және барлық қажетті құжаттарды тіркеу өтініш берілген күннен бастап саналады.
Зейнетақы төлемдерін тіркеу үшін келесі құжаттар қажет: жеке куәлік, өтініш берушінің жұмыс өтілін растайтын құжаттар. Кей жағдайда қосымша құжаттар қажет болуы мүмкін: білімі туралы диплом, әскери билет, неке туралы куәлік, балалардың туу туралы куәліктері, «қандас» мәртебесін растайтын құжат және тағы басқалары. Өтінішті электронды үкіметтің egov.kz онлайн-порталы арқылы да беруге болады. Ол үшін электронды цифрлы қолтаңба болу керек. Порталға тіркелген соң «Азаматтарға» арналған қызметтердің ішінен «Әлеуметтік қамсыздандыруды», оның ішінде «Мемлекеттік базалық зейнетақыны тағайындау» қызметін таңдап, «Қызметке онлайн тапсырыс беру» дегенді басу керек. Өтінішті толтырып, ЭЦҚ арқылы қол қоясыз. Порталдан өтініміңіздің статусын бақылап отыруға болады.
Шымкенттіктерге зейнетақыны рәсімдеу үшін зейнеткерлік жасқа толуына 10 күн қалғанда ХҚКО-ға хабарласуға кеңес береміз. 2023 жылдан бастап ер адамдар зейнеткерлікке 63 жаста, ал әйелдер 61 жастан бастап шыға алады.
2022 жылы 65 мыңнан астам шымкенттік жасына байланысты зейнетақы тағайындауға өтініш берді.
Айта кетсек,зейнетақы қорында үш түрлі шот ашуға болады. БЖЗҚ шоты туралы ақпаратты тек әр адамның өзі білгені дұрыс. Біріншісі – міндетті зейнетақы шоты. Ол автоматты түрде ашылады. Ең бірінші төлем жасалғанда, яғни жұмыс беруші жарнаны жіберген кезде құжаттарда көрсетілген деректемелер бойынша зейнетақы шоты ашылады, кейін міндетті жарна осы шотқа аударылып отырады.
Екіншісі – міндетті кәсіптік зейнетақы шоты. Бұл шот денсаулыққа зиян қызметтерді атқаратын азаматтар үшін ашылады. Мұндай мекемелерді Үкімет белгілейді. Азаматтар өзінің жұмыс берушісімен бірге зейнетақы қорына келіп, шот ашып, ақша жинай алады. Үшіншісі – ерікті зейнетақы шоты. Бұл шотты азаматтар цифрлы қолтаңбамен ашады. Онда қаражатты жұмыс беруші арқылы жинауға, туған-туыстары қосылып бірге ақша салып отыруына болады.
