Қазығұрт ауданының адами әлеуетті дамыту бөліміне қарасты Ә.Бектаев атындағы жалпы орта білім беретін мектебінің базасында директордың оқу ісі жөніндегі орынбасарларына арналған «ТИІМДІ КЕРІ БАЙЛАНЫС – НӘТИЖЕЛІЛІКТІҢ КЕПІЛІ » тақырыбында аудандық тәжірибелік семинары болып өтті.
Семинардың мақсаты тиімді кері байланыс құралдары арқылы оқу мақсатының нәтижелілігін қамтамасыз ету. Мектеп директоры А.Оспанов пен әдістемелік кабинет меңгерушісі А.Шерова семинардың бағдарламасымен таныстырып, семинарды ашып берді.
Семинар басында әдебиеттік оқу, қазақ әдебиеті, математика, биология, химия, физика, орыс тілі мен әдебиеті пәндерінен ашық сабақтар өткізілді. Ашық сабақтар түрлі цифрлық білім беру ресурстары қолданылып, жоғары деңгейде өтті.
Кері байланыс оқушының оқыту үрдісі қалай өткені және қандай нәтижеге қол жеткізгендігі туралы ой-пікірін тыңдауға негізделеді. Кері байланыс сабақ барысында оқушылардың өз бетімен орындайтын тапсырмаларының соңында жүргізіліп отыруы керек. Рефлексия мақсаты – еске түсіру, өзінің сабақ барысындағы іс-әрекетіне баға беру, талдау және мәселелердің шешу жолдарын іздестіру. Мұғалім оқушының кез келген кері байланыс парағын оқи отырып, жұмысының сәтсіз шыққан тұсын және сәтті шыққан қадамын, ендігі іс-әрекетін қалай жақсартуға болатынын алдын ала біледі. Сонымен қатар, кері байланыс парағы арқылы оқушының үніне құлақ түріп, оқу мен оқытудағы кездесетін кедергілерді айқындап, келесі оқытуға бұдан да жақсырақ дайындалуына түрткі болады.
Атап айтқанда «Bilimland», «Plickers», «Word wall», «Padlet», «Quizziz», «Kahoot» сияқты платформалары белсенді әдіс-тәсілдермен үйлесім тауып, білім алушылар сабақтың оқу мақсатына жеткендігі кері байланыста көрініс тапты. Семинарға келген оқу орынбасарлары ашық сабақ өткізген ұстаздардың қолданған белсенді әдіс-тәсілдері мен цифрлық білім беру ресурстарының ұтымды болғанын атап өтті.
Аудандық әдістемелік кабинет меңгерушісі А.Шерова өтілген ашық сабақтар мен шебер сыныпқа кері байланыс беріп, өзінің әдістемелік ұсынымдарымен бөлісті. Сөз соңында А.Шерова мектеп ұжымы мен басшылығына өз алғысын білдіріп, семинардың жоғары деңгейде өткендігін атап өтті.
