Түркістан облысы адами әлеуетті дамыту басқармасы «Дарынды балаларды анықтау және қолдау орталығы» және Қазығұрт ауданының адами әлеуетті дамыту бөлімі әдістемелік кабинеттің қазақ тілі мен әдебиеті пәні әдіскері А. Калдыбаеваның ұйымдастыруымен Облыстық «Абайтану» олимпиадасының аудандық кезеңі Е.Тасанбаев атындағы жалпы орта білім беретін мектебінде өткізілді.
Ұлы ақынның бай мұрасын жас ұрпақ санасына терең әрі жан-жақты сіңіріп, өнеге мен тәрбиенің алтын қазығына айналдыруды көздеген олимпиаданың негізгі мақсаты М.Әуезовтің «Абай жолы» роман-эпопеясын толық меңгеру арқылы кемеңгердің ақындық болмысына үңілуге, Абайдың шығармашылық өмірінен ғибрат алып, өмірде қолдана алуға жол сілтеу зияткерлік және шығармашылық қабілеттерін дамытуға бағытталған.
Олимпиаданың негізгі міндеті – Абай өлеңдерінің мән-маңызы мен қадір-қасиетін түсінуге бейімдеу, хакім қара сөздерінің тәрбиелік-тағылымдық маңызын меңгеру, Абайша ойлауға ұмтылу, сөйлеу мәдениетін үйренуге, тіл тазалығын сақтауға дағдылану және күнделікті өмірде қолдану.
Олимпиада екі айналымда өтті. Бірінші айналымда қатысушы Абай қара сөздері мен поэзиясы негізінде дайындалған тақырыптардың біріне эссе жазса, екінші айналымда қатысушы М.Әуезовтің «Абай жолы» романынан берілген үзіндінің қай тарау, бөлімнен алынғанын айтып, мазмұнын жалғастырды және роман мазмұнынан «сократтық» сұрақтар беріліп, логикалық деңгейі тексерілді. Сондай-ақ Абай шығармашылығы бойынша дайындалған тапсырмаларға жауап берді. Оның ішінде өлеңнің адам өміріндегі орнын, ақынның шығармашылықтағы мақсатын Абай өлеңдерімен дәлелдеді. Ал Абай поэзиясын қалай меңгергенін байқау барысында ақын өлеңдерінің құрылысындағы ерекшеліктерді анықтап, қазақ поэзиясына қосқан жаңалығын дәлелдеді. Сонымен бірге Абай іліміне оқушы өз көзқарасын білдірді. Мысалы, Абай айтқан «бес асыл істің» бүгінгі өзектілігі туралы, хакімнің халқына қандай жол ұсынғаны туралы өз ой-пікірлерін айтты. Және абайтанушылар жайлы жалпы білімін көрсетіп, «Абай жолы» романынан алынған сөйлемге кешенді талдау жасау арқылы грамматикалық сауаттылығын көрсетті.
Аудан көлемінде 9-10-11 сынып оқушылары арасында өткен бұл байқауға жалпы саны 127оқушы бақтарын сынады.
Олимпиаданың негізгі мақсаты — Абай Құнанбайұлының шығармашылығын дәріптеу, қара сөздерін оқыту арқылы көкірегі ояу, көзі ашық жас шәкірттерді тәрбиелеу болып табылды.
Аудандық кезеңнен жеңімпаз болған 9-сыныптан М. Әуезов атындағы жоббм Абдужаппар Сымбат, 10- сыныптан «Болашақ» м\г Оразалы Сымбат, 11- сыныптан «Қақпақ» жоббм Сейсен Айымжан атты оқушылар облысқа І орынмен жолдама алды.
