Бүгінде аудандағы күрделі жөндеуден өткізілген мәдениет үйінде алғаш болып аудандық «Арай» байқауы өткізілді. Жиынға аудан әкімі Арман Абдуллаев арнайы қатысып, өнерпаздарға сәттілік тіледі.
«Биылғы өтіп жатқан байқаудың орны ерекше. Аудандық мәдениет үйі күрделі жөндеуден өткеннен кейін алғаш байқаумен бастауының да өзіндік мәні бар. Облыс аумағында шын шеберлер шеберханасы атанған ауданымыз көркем өнерпаздарының қатарын толықтырар шынайы дарабоздарға сенім арта отырып, өнерлі жастарымыз топ жарарына сенім артамын», — деді аудан әкімі.Жастарды отансүйгіштікке баулитын байқауда қатысушылар шеберліктерін көрсетіп, жаңа эстрадалық әндерді шырқады. Түрлі іс-шараларды жүргізу қабілеттерін байқатты.
Алдымен, байқау тарихына тоқталсақ. «Ақкөгершін» деген атпен 1993 жылы басталған байқау 1995 жылдан бері «Арай» деп аталып келеді. Басты мақсат — жастарды отансүйгіштікке баулып, ұлттық рухты тәрбиелеп, эстрадалық ән орындау өнерін дамыту. Сонымен қатар, жаңа эстрадалық әндерді халық арасында кеңінен насихаттап жас талант иелерін және мәдени іс-шара жүргізушілерін анықтау. Бұл байқаудан түлеп ұшқан жас әншілер — бүгінде елімізге танымал өнер майталмандары мен эстрада жұлдыздары. Олардың арасында Бауыржан Исаев, Алтынай Жорабаева, Мадина Сәдуақасова, Асқар Жүнісбеков, Қайрат Түнтеков, «Жігіттер» квартеті сынды әншілер шоғыры бар. Ұлттық рухта тәрбиелеп, отансүйгіштікке баулитын тұрақты өнер байқауында үміткерлер бағын сынап көрді.
Байқау 3 кезеңнен тұрады. Мәдени іс-шара жүргізушілері арасындағы сында тіл тазалығына баса назар аударылады. Ал, әншілер үшін берілетін талаптар аса қиын емес. Тек дауыс ырғағы мен диапазоны кең әнді нақышына келтіріп, орындаса болғаны.
Сайыс нәтижесінде эстрадалық әншілер арасында бас жүлдені Жылға ауылдық округінің тұрғыны Ернұр Лес иеленсе, бірінші орынды Ақтөре Құрбанбек жеңіп алды. Жүлделі екінші орынды Досымхан Баймұханов, үшінші орынды Жадыра Накипова мен Нұркелді Леспек иемденді. Ал мәдени іс-шара жүргізушілері арасында бас жүлдені Жібек жолы ауылдық округінің тұрғыны Индира Раван-Нахчивани иеленді.
