ТҮЛКІБАС: РЕСПУБЛИКАЛЫҚ ОЛИМПИАДАНЫҢ II АУДАНДЫҚ КЕЗЕҢІ ӨТЕДІ

Түлкібас ауданының адами әлеуетті дамыту бөлімінің жалпы білім беретін пәндер бойынша республикалық олимпиаданың екінші аудандық кезеңі 2023 жылдың 30 қаңтарынан 3 ақпанына дейін М.Ломоносов атындағы мектеп-гимназиясының базасында өтеді. Олимпиадаға жалпы білім беретін пәндер бойынша іріктеуден өткен 9,10,11-сынып оқушылары қатысады. Олимпиаданың мақсаттары мен міндеттері: Оқушылардың шығармашылық қабілеттерін дамыту, теориялық білімі мен практикалық дағдыларын тереңдету, жеке тұлғаның өзін-өзі жүзеге асыруына жәрдемдесу, дарынды балаларды анықтау үшін жағдай жасау, білім алушыларды халықаралық олимпиадаларға қатысуға іріктеу және дайындау, Қазақстан Республикасында білім берудің беделін арттыру болып табылады.
Олимпиада 13 пән бойынша өткізіледі:
-жаратылыстану-математикалық бағыт — математика, физика, химия, биология, география, информатика;
— қоғамдық-гуманитарлық бағыт — қазақ тілі мен әдебиеті, орыс тілінде оқытатын мектептердегі қазақ тілі, орыс тілі мен әдебиеті, қазақ тілінде оқытатын мектептердегі орыс тілі, Қазақстан тарихы, құқық негіздері, ағылшын тілі.
Олимпиаданың екінші аудандық кезеңі классикалық олимпиадалық тапсырмалар түрінде, өткізу кестесіне сәйкес, бір турда өткізіледі. Академиялық адалдық пен ашықтықты сақтау мақсатында олимпиада «El Umiti цифрлық онлайн платформасы» ақпараттық жүйесінде веб-камера, фотофиксациямен прокторинг сервисін пайдалана отырып, әр минут сайын суретке түсіру арқылы электрондық форматта өткізілетін болады. Оған Түлкібас ауданының барлық білім беру ұйымдарынан 481 оқушы қатысады.Атап айтсақ: 229 оқушы – жаратылыстану-математикалық бағыттағы пәндер бойынша; 252 оқушы – қоғамдық-гуманитарлық бағыттағы пәндер бойынша.Сондай-ақ олимпиаданың өткізу процесі YouTube каналы арқылы тікелей эфирмен қамтамасыз етіледі.