Түркістан облыстық «Farab» әмбебап ғылыми кітапханасында 2022 жылғы «Әдеби финал» семинары қорытындыланды. Облыстық деңгейдегі шараға аудандық, өңірлік кітапхана басшылары мен қызметкерлері қатысты. Шара барысында кітапхана үздіктері мен «Алтын формуляр» иегері, оқырмандар арасынан үздіктер анықталып, түрлі номинация бойынша марапаттар тапсырылды.
Атап айтсақ, «Әдеби финал» семинарының қорытындысы бойынша бір жыл ішінде 100 кітап оқып, көптің ішінен оза шыққан Өтеген Ысқақұлы қария 2022 жылдың «Алтын формуляр» иегері атанды. Түркістан қаласының тұрғыны Өтеген қария 40 жыл теміржол саласында жұмыс істеген. Зайыбы екеуі 3 ұл, 2 қыз тәрбиелеп өсіріп, бүгінде сол перзенттерінен немере-шөбере сүйіп отырған бақытты ата мен әже. Сонымен қатар «Үздік оқырман отбасы» номинациясына — 2-сынып оқушысы Бекнұр Нұржанұлы, «Кітапхананың тұрақты үздік оқырманы» номинациясына — Шерхан Саматұлы, «Ерекше мүмкіндікке ие оқырман» номинациясына Қымбат Советханқызы ие болды. Барлық жеңімпазды аталмыш кітапхана директоры Жанат Шардарбекова арнайы құттықтап, оларға статуэтка және қаржылай сыйлық табыс етті. Кеш соңында барлық кітапхана директорының қатысуымен «Директор BATTLE» сергіту ойыны өтті.
Түркістан қаласындағы «Фараб» кітапханасы оқырмандарға 2021 жылдың қыркүйек айынан бастап қызмет көрсетіп келеді. Оқырмандар үшін үлкен тәрбие мектебіне, сансыз сұрақтардың жауабын табуға болатын киелі ордаға айналып үлгерген облыстық «Фараб» әмбебап ғылыми кітапханасының директоры Жанат Шардарбекова өткен жылы «Жыл кітапханашысы – 2022» атағымен марапатталған.Еліміз бойынша 20 мыңға жуық кітапханашының арасынан жылына тек біреуіне ғана берілетін мәртебені «Қазақстандық Кітапханалық Одақ» ЗТБ төрағасы Бақытжамал Оспанова тапсырды. «Жыл сайын Одақтың кезекті отырысы ұйымдастырылып, түрлі мәселелер талқыланады. Биылғы жиында «Мәдениет туралы» заңның 24-бабы – кітапхана ісі бойынша өзгеріс енгізу туралы қарастырылып, кітапханашылар өз ұсыныстарын білдірді. Әрі қарай заң жобасы Парламентке ұсынылатын болады. Ал аталған номинацияға лайықты болу үлкен жауапкершілік, сенім артылғанын да білдіреді. Бұл – Түркістан облысындағы 395 кітапхананың бірлесе атқарған еңбегінің нәтижесі», дейді Жанат Сәдібекқызы. Сондай-ақ Ақтөбе облысының мәдениет, архивтер және құжаттама басқармасы мен Ақтөбе облыстық зағиптар және нашар көретін азаматтардың арнаулы кітапханасының ұйымдастыруымен өткен «Ерекше кітаптар әлемі» жобасы аясындағы «Кеңістікте бағдарлау» республикалық байқауының қорытындысы бойынша Түркістан облыстық «Фараб» әмбебап ғылыми кітапханасы III орынға ие болып, арнайы дипломмен марапатталды. Екі ай көлемінде зағип, көзі нашар көретін балаларға арналған тактильді кітаптарды кітапхана қызметкерлері Алия Жұмабек пен Дана Байдәулетова, Айнұр Сұлтанбекова өз қолымен тіккен болатын.
Осы арада айта кетелік, осыған дейін кітапхана қызметкерлері осы күнге дейін ең көп кітап оқыған үш оқырманды анықтаған-ды. Кітапхана қызметкерлері бұл бағыттағы жұмысты жалғастырып 2022 жылдың «Алтын формуляр» иесін арнайы марапатқа ұсынған болатын. Кітапхана директоры Жанат Шардарбекова формулярда оқырманның кітапханадан алған кітаптары жазылатынын, сондықтан жыл соңына дейін «Алтын формуляр» иесі атанып, сый-сияпатқа ие болуға әркімнің-ақ таласы барын айтқан-ды. Жоғарыда айтып өткеніміздей, алдағы уақытта ең көп кітап оқитындар қатары өзгеріп, ұлғая түсері анық.
