Ел Президенті Қасым-Жомарт Тоқаев тарапынан Үкімет отырысында ауыл тұрғындары үшін жайылымдарды қайтару бойынша тапсырма берілген болатын. Бұл бағытта Түркістан облысында жүйелі жұмыстар жүргізілуде.
Осыған орай Келес ауданындағы жер қатынастарын реттеуші органдар тарапынан қажетті талдаулар жүргізіліп, ауылдық елді мекендер тұрғындарының жайылымдық жерлерге деген сұраныс деңгейі анықталды. Нәтижесінде өткен жылы Келес ауданында 81 мың 600 гектар аумақ ортақ қолданысқа берілді. Оның 60 мың 600 гектары бойынша жайылым жерлердің иелерімен меморандум арқылы бірлесіп пайдалану жөнінде келісім жасалды. Сонымен қатар қазіргі таңда ауыл шаруашылығы мақсатындағы жер учаскелерін нысаналы мақсатына сай емес немесе Жер заңнамаларын бұза пайдалану деректерін анықтау үшін «Ғарыш сапары» электронды базасы арқылы жұмыстар жүргізілуде.
Айта кетсек, Келес ауданының жалпы жер көлемі 345 129 гектар болса, оның ішінде ауыл шаруашылығы мақсатындағы жер көлемі 234 535 гектарды құрайды. Ал 207 603 гектар аумақ – жайылым жер.
Еліміз жер көлемі жағынан әлем бойынша 9-орында болғанымен, жердің жетіспеуіне қатысты мәселе жиі бой көрсететін болды. Соның бірі – ауылдағы ағайынға мал жаятын жайылымның тапшылығы. Осыған орай Президент Қасым-Жомарт Тоқаев Үкімет пен Бас прокуратураға бос жатқан жерлерді мемлекет меншігіне қайтару туралы тапсырма берген болатын. Бұл іске «AMANAT» партиясы жанынан құрылған «Жер аманаты» комиссиясы да белсенді атсалысты. Комиссия мүшелері еліміздің әр өңірін аралап, пайдаланылмай жатқан және заңсыз берілген жерді мемлекет меншігіне қайтарумен айналысып келеді. Мысалы, өткен жылы еліміз бойынша 5 миллион гектар жер мемлекет меншігіне өтсе, оның 3 миллион гектары «Жер аманаты» комиссиясының тікелей араласуымен іске асқан.
