Түркістан облысы, Қазығұрт ауданында заманауи үлгідегі «Арсенал» жабық футбол алаңы ашылды.
Кіші футболға арналған алаңды ағайынды кәсіпкерлер әрі ауыл тұрғындары өз қаржыларына салған. Жасанды алаң жабық ғимаратта орналасқандықтан кез келген мезгілде доп тебуге ыңғайлы. Онда футболшыларға барлық жағдай жасалған. Киім ауыстыратын және жуынатын бөлмелер бар.
Ағайынды кәсіпкерлер Нұркен және Олжас Өсербаевтар ауылдағы жабық футбол алаңдарының көбеюі — бұқаралық спортты дамытуға, соның ішінде аудан көлемінде кіші футболдың қарыштап дамуына өз септігін тигізіп жатқандығын жеткізді.
Айта кетерлігі, қазіргі таңда «Қазығұрт» футбол командасы республикалық турнирлерде топ жарып, жүлделі орындарды иеленіп жүр.
Еске салсақ, өткен жылы Түркістан облысы, Қазығұрт ауданының Жаңабазар ауылында 2 жабық кіші футбол алаңшасы өз жұмысын бастаған еді. Алаңды ауыл азаматы, кәсіпкер Тұяқбаев Бақберген өз қаржысына салған.
Айта кетсек, Түркістан тарихында тұңғыш рет қысқы спортпен кәсіби түрде айналысуға мүмкіндік жасалады. Спорт – адам өмірінің ажырамас бөлшегі екенін жиі айтатын өңір басшысының тапсырмасымен Түркістанда «Мұз сарайының» құрылысы жүріп жатыр. Әлемдік стандарттарға сай мұз айдыны 1200 адамға есептелген. Жаңа нысан жыл соңында ашылады. Мұз сарайының жалпы жер аумағы 2 гектарға жуық. Ғимарат құрылысының көлемі – 4160,9 шаршы метр. Нысанның құрылысы келер жылдың көктемінде аяқталады деп жоспарланған. Бұл ғимаратта қысқы спорт түрлері дамытылып, үйірмелер ашылады. Жақын уақытта мұз айдынына керекті құрал-жабдықтар сатып алынады. Түркістан қаласында сондай-ақ «Теннис орталығы», Олимпиадалық резерв мектебінің әкімшілік ғимараты мен жатақханасы, Б.Саттарханов спорт кешені, «Ат спорты кешені» секілді жаңа спорт нысандары ашылады. 35 гектар жерде орналасқан ат спорты кешенінде поло-клуб, манеж, стендтік атысқа арналған алаңқай, садақ атуға арналған алаң, канал арқылы өтетін көпір мен атпен серуендеу аймағы болады.
20 гектар жерде орналасқан «TURAN» футбол академиясының құрылысы қарқынды. Мұнда спортшыларға Еуропаның үздік клубтарындағыдай жағдай жасалмақ. Жаңа кешенде үлкен және шағын 10 футбол алаңы болады. Сондай-ақ нысанда допинг-бақылау кабинеттері, 300 орынды қонақүй, спортшыларға арналған монша, 3 мейрамхана, мәжіліс залдары бар. Сауықтыру орнында медициналық, массаж кабинеттері мен жеке блоктар бар. Елімізде теңдесі жоқ ескек есу каналына да су келді. Облыс орталығындағы спорт кешенінің құрылысы халықаралық талаптарға сай жүргізілуде.
