Түркістан облысының балалар футбол лигасы өз мәресіне жетті. Екі айға созылған жарыс қызыққа толы ойындармен тәнті етті. Жасөспірімдер әр ойында бар күштерін салып лиганың қызығушылығын арттырды. Облысымыздың шалғай аймақтарын қамтитын жобаға биыл 12-ден астам команда қатысып, футболға деген қызығушылықтың жоғары екенін көрсетті. Турнирде жас футболшылар тартысқа толы ойын мен жеңіске деген жігер көрсетті. Әр ойын тартысқа толы соңғы турға дейін интрига болып, соңғы турда 3 орынға талас та тартысты болды.
Айта кетейік, қаламыздың намысын қорғап қатысқан Кентау қаласының құрама командасы жасыл алаңда қарсыластарынан суырылып шығып аталған футбол додасында ІІ орынды иеленді. Сонымен қатар турнирдің «Үздік қақпашы» номинациясын Кентау қаласының спортшысы Пернебай Ағжан иеленді.
Қосымша ақпар, бүгінде облыста 4647 спорт ғимараты тіркелген. Түркістан қаласында жаңа халықаралық теннис орталығы пайдалануға берілді. Ә.Нұрмаханов атындағы облыстық спорт мектебінің спорт кешенін қайта құру және 320 көрерменге арналған қосымша ғимарат салу құрылысы жүргізілуде. Ескек есу каналы мен мұз сарайының құрылысы жүргізілуде.
Сондай-ақ облыс аумағында «Ауыл – Ел бесігі» бағдарламасы аясында Сауран, Мақтаарал, Төлеби, Бәйдібек, Жетісай және Сайрам аудандарында дене шынықтыру-сауықтыру кешендері салынып жатыр.
Алдағы жылы спортпен тұрақты түрде шұғылданушылар санын 42,0 %-ға жеткізу көзделген. Халық арасында бұқаралық спортты дамытып, спорт кешендерін ашу мәселесі де жоспарланған.
2023 жылы Қытай елінде өтетін жазғы Азия Ойындары мен 2024 жылы Францияда өтетін жазғы Олимпиада Ойындарына облыс спортшылары спорттың бокс, дзюдо, грек-рим күресі, еркін және әйелдер күресі, есу спорт түрлері, ауыр атлетика, таеквандо спортынан жолдама алады деп күтіліп отыр. Қазіргі таңда 13 үміткер-спортшы дайындық жұмыстарын жүргізіп жатыр.
