Созақ ауданы әкімдігінің мәдениет, тілдерді дамыту, дене шынықтыру және спорт бөлімінің тарапынан «Шолаққорған ауылының мекеме қызметкерлері арасындағы футзалдан әуесқойлар лигасы» ұйымдастырылған болатын. Екі ай бойы орталық сауықтыру кешенінде жарыс көрігін қыздырған қызметкерлер арасындағы лига өз мәресіне жетті.
Аталған жарысты Созақ ауданының әкімінің орынбасары Қалдыбек Оразов қортындылап, жүлделі орын алған командалар мен үздік деп танылған ойыншыларға аудан әкімінің арнайы дипломы мен кубок, медалін табыс етті.
Лига ойындарына жалпы он алты команда қатысты. Тартысты спорттық дода қортындысы бойынша Созақ ауданы полиция бөлімінің «Қайсар» командасы бірінші орын, «Қайсар» жауапкершілігі шектеулі серіктестігінің командасы екінші орынды иеленсе, Созақ ауданы төтенше жағдайлар бөлімінің «Құтқарушы» командасы үшінші орынға қол жеткізді. Сонымен қатар, жарыстың «Үздік ойыншысы» номинациясымен «Қайсар» жауапкершілігі шектеулі серіктестігі командасының ойыншысы Мұқанбет Қанатұлы жеңіп алды.
Ал «Үздік қорғаушы» номинациясымен Созақ ауданы полиция бөлімінің «Қайсар» командасының ойыншысы Қалижан Бейсенбекұлы марапатталды. Сонымен қатар, «Үздік қақпашы» номинациясы Созақ ауданы төтенше жағдайлар бөлімінің «Құтқарушы» командасының қақпашысы Бейбіт Бекенұлына бұйырды.
Айта өтейік, марапаттау рәсімінде «Ардегер ойыншы» номинациясының иегері де анықталған болатын. Бұл аталымға Созақ ауданы әкімдігінің «Бастау» командасының ойыншысы Айдарбеков Ербол Әбдіәшімұлы лайық деп танылды. Сондай-ақ, соңғы «Сұрмерген» номинациясымен Шолаққорған бас мұнай айдау станциясы, «Мұнайшы» командасының ойыншысы Смайлов Дастан марапатталды.
