Бүгін Түркістан «Оқушылар сарайы» ЮНЕСКО клубының ұйымдастыруымен «Жылды жақсылықпен қарсы ал» атты қолөнер байқауы өтті. Қатысушылар сайысқа ерекше дайындықпен келгені көрініп тұр. Олар бірнеше жас ерекшеліктері бойынша сайысты. Бұл байқау жас ұрпақтың экологиялық мәдениетін арттырып, шығармашылық арқылы табиғаттағы проблемаларға назар аударту мақсатында ұйымдастырылды. «Өнер» бөлімнің ұйымдастыруымен өткен байқауға керамика және мүсін, киім моделін жобалау, зергерлік өнер, шебер қолдар, ағаш шебері, сурет және рмексазбен мүсіндеу үйірмелері қатысты. Байқауға қажетті материалдарды қатысушылар өздерімен бірге алып келіп, пластик, мата қиындылары, қағаз, шикізат пен қалдықтарын пайдаланды.
Байқау нәтижесі бойынша 7-10 жас аралығында Асқарқызы Айкөркем мен Рахманәлі Еркеназ бірінші, Асан Аяла екінші және Мустафаева Раяна үшінші орынды иеленді. 11-14 жас аралығында Керімбек Шах-Карім мен Керімбек Райымбек бірінші орынды иеленсе, Икапова Адема мен Валихан Ақжібек екінші, ал Абдуллахат Ракия үшінші орынға қол жеткізді. Сондай-ақ, 15-17 жас аралығында Әбдіханов Әбдуәлі бірінші, Қайрат Тұрар екінші және Айтбай Мереке үшінші орынды иеленді. Барлық қатысушыларға алғыс хат табысталды.
Айта кетейік, облыстағы 38 қосымша білім беру мекемелерінде – 28 500 оқушы, мектептегі үйірмелерде 355 600 оқушы қосымша біліммен қамтылып, қамту көрсеткіші 70,1%-ды құрады. Қазығұрт ауданында 120 балаға арналған, Келес ауданында 320 балаға және Сайрам ауданында 300 оқушыға арналған жаңадан оқушылар үйі ашылды. Түлкібас ауданы 150 балаға арналған «Өнер» мектебі, Түркістан қаласында заманауи техникамен жабдықталған оқушыларды шығармашылыққа үйрететін «Fablab» шеберханасы ашылды. Кентау, Арыс, Төлеби аудандарында дәл осындай шеберханалар ашылады. Республикалық «Ұлттық мектеп лигасы» жарысында облыс оқушылары 11 алтын, 9 күміс, 7 қола медалға қол жеткізіп, жалпыкомандалық есепте екі жыл қатарынан I орынға ие болды.
