Астанада қаласында «Самұрық-Қазына» компаниялар тобының бірыңғай қайырымдылық операторы болып табылатын «Samruk-Kazyna Trust» әлеуметтік жобаларды дамыту қоры 2022 жылы атқарған жұмыстары бойынша қорытынды есеп беру шарасын өткізген болатын.Samruk-Kazyna Trust әлеуметтік жобаларды дамыту қоры 2016 жылдан бері «Самұрық-Қазына» АҚ компаниялар тобының атынан бірыңғай қайырымдылық қызметімен айналысады. Қор денсаулық сақтау, білім беру, мәдениет, бұқаралық спорт, халықтың әлеуметтік топтарын қолдау салаларында тұрақты түрде өз жобаларын жүзеге асырып келеді. Басты мақсаты Қазақстан Республикасы азаматтарының әлеуметтік-экономикалық өмірін жақсартуға көмектесу болып отыр. Салтанатты шара Samruk-Kazyna Trust әлеуметтік жобаларды дамыту қорының 2022 жылы атқарған қайырымдылық жұмыстарының қорытындысын шығаруға арналды.
Еліміздің әлеуметтік маңызды мәселелерін шешуге бағытталған «Самұрық-Қазына» компаниялар тобы 2022 жылы қайырымдылыққа жұмсалатын бюджетті 40%-ға, яғни 10 млрд теңгеге дейін арттырып, балалар мен Қазақстан аймақтарын қолдауға баса назар аударды. Бір жылда барлығы 43 әлеуметтік жоба жүзеге асырылып, 500 мыңға жуық қазақстандық көмек алды.
Аталған іс-шараға қатысқан аудан әкімінің орынбасары Е.Оралбай мен Отырар аудандық орталық аурухананың бас дәрігері Е.Нұрлыхановқа «Samruk-Kazyna Trust» әлеуметтік жобаларды дамыту қорының директоры А.Адиева ауданымызға екі жедел жәрдем көлігін арнайы табыстады.
Жиынға қатысқан Отырар ауданының әкімінің орынбасары Ержан Асанұлы аудан халқының атынан, «Samruk-Kazyna Trust» әлеуметтік жобаларды дамыту қорына алғысын жеткізіп, алдағы жұмыстарына сәттілік тіледі.
Қорытынды кеште «Самұрық-Қазына» АҚ-ның қоғаммен байланыс және өзгерістерді басқару жөніндегі басқарушы директоры Ғибрат Ауғанов Абай облысы әкімінің орынбасары Шалқар Байбековке Samruk-Kazyna Trust әлеуметтік жобаларды дамыту қоры тарапынан арнайы медициналық көліктер — 5 реанимобиль мен 3 инватакси сертификатын табыстады. Жаңа көліктердің медициналық қызмет көрсету сапасын жақсартуға септігін тигізетіні анық.
