ТҮРКІСТАН: Сайрамда Құралай Сәтмұханбетовамен шығармашылық кездесу кеші өтті

«Ардақты ана» облыстық музейінде ҚР Мәдениет қайраткері, ҚР Композиторлар одағының мүшесі, әнші, сазгер Құралай Сәтмұханбетовамен шығармашылық кездесу кеші өтті. Құралай Сәтмұхамбетова – оңтүстік өңірінен шыққан белгілі композиторлардың бірі. 150-ге жуық ән жазып, жүрек тебірентер әуездерімен әлікүнге дейін халықтың сүйіктісі болып келеді. Бүгінде шәкірт тәрбиелеп, ізбасарларына өнердің қыр-сырын үйретіп жүрген жан әлі де талай биікті бағындырмақ. Кешке келген қонақтар Республикалық байқаулардың лауреаты, композитор-әнші, «Алтынай», «Аппақ гүлдер», «Арман — әнім», «Ауылға барам», «Сені көргім келеді де тұрады», «Ару Ана», «Елім аман» т. б. әуезді әндері ел арасында кеңінен тараған Құралай Сәтмұханбетоваға арналған арнайы бұрышпен танысты.
Құралай Сәтмұханбетованың өнердегі замандас — әріптесі ҚР мәдениет қайраткері Абылайхан Оспанов, «Көркем» әжелер ансамблінің жетекшісі Роза Әлімбекқызы құттықтау сөзге шығып сазгерге деген жүрекжарды тілектерін жаудырып, ән өнерін ұлықтап жүргені үшін алғыстарын жеткізді.
Шара барысында Сайрам аудандық мәдениет үйінің директоры Даулетхан Алашбаев кеш иесіне жылы лебізін білдіріп, бөлім басшысы Мади Абайұлы Нұрлыбаевтың арнайы Адресатын табыстады.
Тағылымдық-өнегелік кездесу кешінде сазгердің өмірі мен шабытты шығармашылығы дәріптеліп, өнерде жеткен жетістіктері айтылды. Құралай Сәтмұханбетова өзінің танымал «Аппақ гүлдер» және «Сені көргім келеді де тұрады» атты әндерін шашу етті. Сайрам аудандық мәдениет үйінің әншілері Алан Қадыр «Елге сапар», Ержан Темірбайұлы «Әке-ана» әнін орындап кеш қонақтарына жарқын көңіл-күй сыйлады.
Кеш соңында «Ел аман» әнін қонақтар сазгермен бірге шырқады. Айта кетсек, Құралай Сәтмұхамбетова – Қазақстан композиторлар одағының мүшесі, республикалық байқаулардың лауреаты, композитор-әнші.