Қазығұрт аудандық орталықтандырылған кітапханалар жүйесіне қарасты Қаржан ауылдық кітапханасында әскери қолбасшы, генерал-майор, Кеңес Одағының Батыры Иван Панфиловтың туғанына 130 жыл толуына орай «Ерлігі — ел есінде» атты танымдық кеші өткізілді. Оқушылар даңқты батырды дәріптеді. Рухани шараның басты мақсаты, Панфиловтың ерлігі мен батырлығынан оқырмандарға мағлұмат беру, бойына патриоттық сезім қалыптастыру, Отанды сүюге тəрбиелеу.
Иван Панфилов Ұлы Отан соғысы басталған алғашқы күндері, 1941 жылғы маусымда Алматыда 316-атқыштар дивизиясын құрды. Даңқты батыр Бауыржан Момышұлы осы дивизияның батальон командирі болды. Дәл осы дивизия 1941 жылдың қазан-қараша айларында Мәскеу түбінде, Волоколамск бағытында жаумен шайқасып, фашистерді тойтарды. Ал Панфиловтың өзі шайқаста қаза болды. Мәскеудегі «Новодевичий» зиратында жерленді. 1942 жылы сәуірде Панфиловқа қаза болғаннан кейін Кеңес Одағының Батыры атағы берілді.
Генерал қаза болған Гусенево ауылында ескерткіш орнатылды. Оның есімі Қазақстанның, Қырғызстанның, Беларусьтің және Ресейдің әртүрлі қалаларындағы көше мен мектеп атауларына берілді. Астанада да Иван Панфилов көшесі бар. Қазақстанда Жетісу облысының құрамында және Қырғызстанда Шу облысында Панфилов ауданы бар.
Иван Панфилов ескерткіші Бішкекте тұрғызылды. Астанадағы «Жерұйық» саябағында да 2015 жылдың 7 мамырында Жеңістің 70 жылдығына орай қоладан құйылған ескерткіші ашылды. Оның биіктігі – 2,5 метр. Авторы – Ренат Әбенов. Ескерткіштің шығыс жағында аллеяның бойында табиғи граниттен 28 жауынгер-панфиловшының аттары, туған жылдары мен қаза тапқан күндері жазылған ескерткіш-тақта мен стелла орнатылды.
Шара аясында оқырмандар сұрақтарына жауап алып, батырдың өмірі туралы бірқатар ақпаратқа қанық болды.
