Арыстық азамат 4 ауыл тұрғындарына қайырымдылық жасап, ел алғысына бөленді. Жеке кәсіпкер Олжас Сансызбайұлының бастамасымен жергілікті белсенді жігіттер тұрмысы төмен әрі көмекке мұқтаж отбасыларға қайырымдылық шарасын ұйымдастырып, қол ұшын созды.
Атап айтқанда, 7 тонна көмір қапталып, 30 отбасы мен 2 мешітке тегін таратылды. Сондай-ақ, 40 қап ұн көпбалалы отбасылар мен асыраушысынан айырылған жандардың үйіне жеткізіліп, ондаған ананың көңіліне қуаныш, ұл-қыздардың жүзіне күлкі сыйлады.
Адам баласының жанын жадырататын мұндай шарадан дін өкілдері де шет қалмай, Ақдала, Дермене, Еңбекші елді мекенінің белсенді жастары да бір кісідей атсалысқан. Жақсылық жасауда жарысатын арыстық кәсіпкерлер бұл бағыттағы жұмыстар әлі де жалғасын табатынын айтады. Ал ауыл тұрғындары болса, естігенде елең еткізетін, жұма күнгі мұндай шараны дәстүрге айналдыруға атсалысамыз дейді.
Айта кетейік, Олжас Сансызбайұлы бұдан да бөлек қайырымдылық шараларын тұрақты түрде ұйымдастырып келеді. Ақдала ауылында халыққа тұрақты түрде қызмет ұсынатын қоғамдық монша ашқан кәсіпкер әлеуметтік аз қамтылған ауыл тұрғындарына монша қызметін тегін ұсынып, ауыл тұрғындарының алғысына ие болған. Сондай-ақ, Арыс қаласында осы аптада табиғат тосын мінез танытып, қалың қар түсті. Қар тазалау әсіресе жалғызілікті, мүгедектігі бар қарияларды әбігерге салатыны анық. Осы ретте Арыс қалалық ішкі саясат бөліміне қарасты «Жастар ресурстық орталығының» еріктілері ауылдық округтердегі қарттардың ауласын тазалауға қол ұшын созды. Мектеп оқушыларынан бастап жасы ересек азаматтарға дейінгі еріктілер ауылдардағы ардагерлерге, зейнет жасындағы және жалғыз басты қарттар мен аналарға қолдан келген көмектерін ұсынды.
Байырқұм, ауылының жігерлі жастары жалғызбасты ананың ауласын қардан тазалап, отын-суы мен үй шаруашылық жұмыстарына жәрдем етіп батасын алды. Дәл осындай қайырымдылық шарасы Дермене, Жиделі, Монтайтас ауылдарында да жалғасын тапты. Игі істен Ақдала еріктілері де қалыс қалмады. Олар ауыл ақсақалы Баянбай Рахымбердиевтің үй іргесін қардан аршып, қолғабыс етті.
Дария көңілді қариялар үйіне көмекке келген жастарға ақ батасын беріп, алғыстарын жаудырды. «Қайырымдылық жасасаң қайырымын өзің көресің» дегенді нық ұстанған жастар «мақсатымыз — азаматтарды сауапты істерге тарта отырып, ізгілікті насихаттау» дейді.
