Мемлекет басшысы Қасым-Жомарт Тоқаев Қазақстан халқына арнаған Жолдауында қарапайым еңбек адамына құрмет көрсету қажеттігі жөнінде айтты. Осы орайда, Төлеби ауданында он жылдан астам уақыттан бері «Жыл үздіктері» номинация иелерін марапаттау рәсімі ұйымдастырылуда. Жылдың қорытындысы бойынша әр сала үздіктерінің басын қосып, олардың еңбектерін үлгі етіп, атқарған жұмыстарын дәріптеу мақсатындағы салтанатты жиын аудандық Мәдениет үйінде өтті.
Мерекелік басқосу барысында аудан әкімі Төлеген Телғараев, аудандық мәслихат хатшысы Нұрлан Қойбағаров мәдениет және руханият, білім беру, денсаулық сақтау, спорт, құрылыс, кәсіпкерлік және өнеркәсіп, коммуналдық шаруашылық, әлеуметтік және тағы басқа салаларда еселі еңбегімен дараланған, елімізге шынайы қызмет етіп, өз мамандығын жете меңгергендерді құттықтап, «Жыл үздігі» төсбелгісін, арнайы диплом табыс етті.
Ауданның 90 жылда жеткен жетістігіне сала мамандары ерекше үлес қосты. Барлық жеміс те, жеңіс те еңбекпен келеді. Осы орайда, Шәкәрім Құдайбердіұлының «Адап еңбек еткен ел-жұрттың көңілі шат» деп қандай да бір істі адал атқаруға шақырады. Ел игілілігі жолында әр сала мамандарының атқарып отырған еңбегі, қызметі маңызды. Өзінің туып-өскен жері үшін, елі үшін еңбек еткен әр адамның еңбегі еленуі тиіс. Халық тарапынан бағасын алуы керек. Бұл біздің елдігімізді көрсететін дүние, деді құттықтау сөзінде аудан әкімі Төлеген Тұртайұлы.
Салтанатты шарада ел экономикасын, халықтың әлеуметтік-тұрмыстық жағдайын, мәдениетін дамытуға үлес қосқандарға ауданның 90 жылдық мерейтойына арналған төсбелгі, «Төлеби ауданының Құрметті азаматы» атағы берілді.
Үздіктер — өз салаларыңызда қажырлы еңбек етіп, табандылық танытып, шығармашылық ізденістеріңіздің өрісін кеңейте білдіңіздер. Осы ізгі қасиеттеріңіздің арқасында жүзден жүйрік, мыңнан тұлпар атандыңыздар. Осынау жетістіктеріңізбен шын жүректен құттықтаймын, деді құттықтау сөзінде аудандық мәслихат хатшысы Нұрлан Хамзаұлы.
Мерекелік жиын концерттік бағдарламаға ұласып, аудандық Мәдениет үйінің өнерпаздары әуелете ән шырқап, күмбірлете күй төкті.
