Тәжікстан Республикасының астанасы Душанбе қаласында Қазақстан мен Тәжікстан арасындағы дипломатиялық қатынастардың 30 жылдығына орай концерт өтті. Аталмыш іс-шара Қазақстан Республикасының Тәжікстан Республикасындағы елшілігінің бастамасымен және Түркістан облысы әкімдігінің қолдауымен ұйымдастырылған. Мерекелік концертте Түркістан облысы мәдениет басқармасына қарасты Шәмші Қалдаяқов атындағы облыстық филармониясының жезтаңдай әншілері мен дәулескер күйшілері өнер көрсетті.
Салтанатты шараға Тәжікстан Республикасының министрліктері мен ведомстволарының және БАҚ өкілдері мен аккредиттелген дипломатиялық корпус шақырылды. Қазақстанның Тәжікстандағы Төтенше және Өкілетті Елшісі Уәлихан Төреханов өзінің құттықтау сөзінде екі ел басшылары арасындағы өзара қарым-қатынастың жоғары деңгейін, стратегиялық әріптестік, өзара тиімді сауда-экономикалық және мәдени-гуманитарлық ынтымақтастық дамуының оң динамикасын, сондай-ақ қазақ және тәжік халықтары арасындағы достық пен тату көршіліктің берік байланыстарын атап өтті.
Салтанатты іс-шара барысында қазақтың халық әндері мен күйлері, сондай-ақ қазақтың біртуар азаматтары Ш.Қалдаяқов, Н.Тілендиев, М.Байбосынов және басқа да авторлардың әндері шырқалды. Сондай-ақ тәжіктің белгілі әндері орындалды. Айта кетейік, екі ел арасындағы дипломатиялық қатынастардың 30 жылдығына орай алдағы уақытта да бірқатар іс-шаралар өткізу жоспарланып отыр.
Екі ел арасында ежелден қалыптасқан жарасымды байланыс бар. Түсінігі мен ұстанымы ұқсас мемлекеттердің өзара ынтымақтастығы жылдар жылжыған сайын артпаса, кеміген жоқ. Қазіргі таңда Тәжікстан – Қазақстанның маңызды одақтасы әрі серіктесі. Мұндай сенім мен достыққа негізделген қарым-қатынас елдерімізді жақындастыра түседі. Айта кетейік, Мемлекет басшысы Қасым-Жомарт Тоқаевтың атына Қазақстан мен Тәжікстан арасында дипломатиялық қатынастардың орнағанына 30 жыл толуына орай Тәжікстан Президенті Эмомали Рахмонның құттықтау жеделхаты келіп түсті.
«Тәжік тарапы екі елдің достық қатынастарын нығайту үшін осы уақыт аралығында қол жеткізген нәтижелерін жоғары бағалайды. Бұл ретте мемлекетаралық қатынастарды реттеудің сенімді шарттық-құқықтық базасы мен нақты механизмдері қалыптасты. Осы берік негізге және өзара сенім мен құрметтің, стратегиялық серіктестіктің мызғымас қағидаттарына негізделген ынтымақтастығымыз бүгінде барлық бағыт бойынша қарқынды дамып келе жатқаны қуантады. Біз халықтарымыздың түбегейлі мүдделеріне сай келетін өзара тиімді ынтымақтастықты бірлесе отырып, бұдан да жоғары деңгейге көтеруге ұмтылатынымызға сенімдімін», – деп жазылған жеделхатта. Эмомали Рахмон Қасым-Жомарт Тоқаевқа аса жауапты мемлекеттік қызметте зор табыс, ал достас Қазақстан халқына бейбітшілік және бақ-береке тіледі.
